Hukumatning 2026-yil 20-avgustdagi 451-son qarori bilan «Kasbiy taʼlim tashkilotlari direktorlari va direktor oʻrinbosarlarini menejerlik oʻquv kurslarida oʻqitish va ularga menejerlik sertifikatini berish tartibi toʻgʻrisida»gi nizom tasdiqlandi.
Nizomga muvofiq, texnikumlarda faoliyat yuritayotgan direktorlar va direktor oʻrinbosarlari belgilangan tartibda menejerlik sertifikatini oladi.
Buning uchun direktorlar va ularning oʻrinbosarlari maxsus portal orqali roʻyxatdan oʻtib, menejerlik oʻquv kursida qatnashish uchun elektron ariza topshiradi.
Oʻquv kursini muvaffaqiyatli yakunlagan tinglovchilar yakuniy sinovdan oʻtadi. Sinovda ijobiy natija qayd etgan tinglovchiga natijalar eʼlon qilingan kundan boshlab bir hafta ichida oʻquv tashkiloti rahbarining buyrugʻi asosida davlat namunasidagi menejerlik sertifikati beriladi.
Sertifikat elektron shaklda rasmiylashtiriladi. U elektron raqamli imzo bilan tasdiqlanadi va unga QR-kod joylashtiriladi.
Shu bilan birga, ilmiy daraja yoki ilmiy unvonga ega boʻlgan direktorlar va direktor oʻrinbosarlari uchun alohida tartib belgilangan. Ularga menejerlik sertifikati oʻz arizasi asosida toʻgʻridan toʻgʻri 3 yil muddatga beriladi.
Yangi tartib kasbiy taʼlim tashkilotlarida rahbarlik qilayotgan kadrlarning boshqaruv koʻnikmalarini tizimli ravishda rivojlantirish va ularning menejerlik malakasini sertifikatlashni nazarda tutadi.
