Andijonda MDHda yagona yapon tilidan test imtihonlari qabul qiluvchi markaz ochildi

Joriy yilning 22 sentabr kuni Andijon Mashinasozlik institutida Markaziy Osiyo va MDHda yagona yapon tilidan test imtihonlarini qabul qiluvchi NAT-TEST Markazi o‘z faoliyatini boshladi. Bu haqda KUN.UZ’ga Andijon Mashinasozlik instituti matbuot xizmati xabar bermoqda.

Markazning ochilish marosimiga yaponiyaning NAT-TEST Markazi rahbari Kamata Atsushi ham tashrif buyurdi. Yuksak martabali mexmon markaz va undagi sharoitlar bilan tanishar ekan, yaratilgan sharoit va imkoniyatlarga yuqori baho berdi va hamkorlik qilishdan mamnun ekanligini ta'kidlab o‘tdi.

Kamata Atsushi va Andijon Mashinasozlik instituti rektori U.Salomovlar NAT-TEST Markazini tantanali ravishda ochib berishdi. Shundan so‘ng Markazning faoliyati, istiqbolli rejalar, Yapon tilidan test imtihonlarini qabul qilish jarayonlari bilan bog‘liq bir qator masalalar yuzasidan fikr almashildi.

– O‘zbekiston ulkan imkoniyatlar yurti ekanligiga yana bir bor guvoh bo‘lmoqdaman, – dedi Kamata Atsushi. – Markaziy Osiyoda yagona bo‘lgan bu markazda yapon tilidan test imtihonlarini topshirish uchun barcha sharoitlar yaratilgan. O‘ylaymanki, har tomonlama qulay va samarali bo‘lgan hamkorligimiz uzoq davom etadi. Yuksak darajadagi e'tibor uchun tashakkur deb qolaman.