Toshkentdan Andijonga yangi ekspress konteyner yuk poyezdi qatnovi yo‘lga qo‘yiladi

Joriy yil oktabr oyidan boshlab "Toshkent-Pop-Marg‘ilon-Andijon" yo‘nalishida yangi ekspress konteyner  yuk poyezdi qatnovi yo‘lga qo‘yiladi, deb xabar berdi “O‘zbekiston temir yo‘llari” aksiyadorlik jamiyati matbuot xizmati.

Xabarda ta'kidlanishicha, poyezd qatnovi kichik biznes va xususiy tadbirkorlik sub'yektlarini qo‘llab-quvvatlash va ularga qulay shart-sharoitlar yaratish maqsadida yo‘lga qo‘yilmoqda.

“Mazkur poyezd aniq jadval asosida haftada ikki marotaba harakatlanishi va unda tadbirkorlarning turli xil hajmdagi yuklarini 20 futlik konteynerlarda 10 soat muddatda hamda arzon narxlarda o‘z manziliga yetkazib berish ko‘zda tutilgan”, deyiladi xabarda. 

Bu yangi temir yo‘l transporti xizmatidan foydalanish istagida bo‘lgan fuqarolar yoki tadbirkorlar  +99878 1503410 (333), +998712996254 telefon raqamlari hamda [email protected], [email protected] elektron pochtalari orqali murojaat qilib buyurtmalar berishi hamda o‘zlarini qiziqtirgan savollarga javob olishlari mumkinligi qo‘shimcha qilingan.