Buxoroda «Lasetti» yonib ketdi, mashina ichidagi 4 kishi halok bo‘ldi

Buxoro viloyati Favqulodda vaziyatlar boshqarmasidan olingan ma'lumotga asosan, joriy yilning 22 oktabr kuni soat 12:00larda Jondor tumani Gazli hududidan o‘tuvchi A-380 avtomobil yo‘lining 333-km.da harakatlanib ketayotgan «Lasetti» rusumli avtomobil boshqaruvni yo‘qotgan.

FVV xabarida aytilishicha, u shu yo‘nalishda harakatlanib ketayotgan «Isuzu» yuk mashinasining orqa tomoniga kelib urilgan. 

To‘qnashuv natijasida «Lasetti» avtomobilida yong‘in chiqib, mashina ichidagi 4 nafar fuqaro vafot etgan.

Sodir bo‘lgan YTH yuzasidan dastlabki tergovoldi tekshiruv ishlari olib borilmoqda.

Eslatib o‘tamiz, avvalroq Qoraqalpog‘istondagi YTH natijasida 5 nafar fuqaro vafot etgani va 5 nafar fuqaro tan jarohati olgani xabar berilgandi.