Davlat mulki obekti uchun ijara to‘lovi kimlarga 50 foiz miqdorida belgilanadi?

O‘zbekiston Respublikasi Vazirlar Mahkamasining 2018 yil 20 oktabrdagi 840-sonli qaroriga muvofiq,  hukumatning ba'zi qarorlariga o‘zgartirish va tuzatishlar kiritildi. Unga ko‘ra, O‘zbekiston Respublikasi Prezidentining 2018 yil 11 iyundagi 3782-sonli "Aholining ijtimoiy zaif qatlami bandligini ta'minlashni rag‘batlantirishning tashkiliy chora-tadbirlari to‘g‘risida"gi qaroriga muvofiq quyidagi alohida toifadagi tadbirkorlik sub'yektlariga davlat mulki obekti uchun ijara to‘lovi ushbu obektga nisbatan eng kam ijara to‘lovi stavkasining 50 foizi miqdorida belgilanadi:

• hisobot davrining yakuni bo‘yicha ishlab chiqaradigan mahsulotlarini sotishdan tushgan tushumining umumiy hajmining kamida 30 foizini nogironligi bo‘lgan shaxslar uchun protez-ortopediya buyumlari va inventarlar ishlab chiqarish, ularga ortopedik protezlash, protez-ortopediya buyumlari va inventarlarini ta'mirlash xizmatlari ko‘rsatishdan tushgan tushum tashkil etgan tadbirkorlik sub'yekti;
• hisobot davrining yakuni bo‘yicha ishlab chiqaradigan mahsulotlarini sotishdan tushgan tushumning umumiy hajmida kamida 20 foizini Brayl alifboli kitob va boshqa bosma materiallar, imkoniyati cheklangan bolalarga o‘quv va badiiy adabiyotlarni chop etish, ishora tilini qo‘llagan holda audio kitob hamda video materiallar ishlashdan tushgan tushum tashkil etgan tadbirkorlik sub'yekti;
• mehnat shartnomasi asosida ishlayotgan xodimlarining kamida 30 foizini nogironligi bo‘lgan shaxslar, 16 yoshga to‘lmagan bolalari yoki nogironligi bo‘lgan bolalari bor yolg‘iz shaxslar, jazoni ijro etuvchi muassasalardan ozod etilgan shaxslar, odam savdosi qurbonlari, o‘qishni tugatgan kundan boshlab uch yil o‘tmagan umumiy o‘rta, o‘rta maxsus va kasb-hunar ta'limi muassasalari bitiruvchilari, mehribonlik uylarining 30 yoshga yetmagan bitiruvchilari tashkil etgan tadbirkorlik sub'yekti.

Shuningdek, Vazirlar Mahkamasining 2014 yil 6 oktabrdagi 279-sonli qarori bilan tasdiqlangan "Davlat mulki obektlarini xaridor tomonidan investitsiyaviy va ijtimoiy majburiyatlar qabul qilinishi sharti bilan "nol" xarid qiymati bo‘yicha sotish tartibi to‘g‘risida"gi nizom 29-bandi tahrir qilindi. Unga ko‘ra, investitsiya majburiyatlari miqdori bo‘yicha ham, ijtimoiy majburiyatlar bo‘yicha ham ikki va undan ko‘p tanlov takliflari teng bo‘lgan taqdirda, O‘zbekiston Prezidentining "Aholining ijtimoiy zaif qatlami bandligini ta'minlashni rag‘batlantirishning tashkiliy chora-tadbirlari to‘g‘risida"gi 3782-sonli qaroriga muvofiq, alohida toifaga kiritilgan tadbirkorlik sub'yekti ustun huquqqa ega bo‘ladi, u bo‘lmagan taqdirda esa - taklifini olgan hududiy tanlov komissiyasi ro‘yxatidan o‘tkazgan qatnashchi g‘olib deya e'tirof etiladi.

Bundan tashqari, Vazirlar Mahkamasining "Mikrofirmalar va kichik korxonalar tomonidan yagona ijtimoiy to‘lovni hisoblash va to‘lash tartibi to‘g‘risida"gi 2015 yil 13 fevraldagi 26-sonli qaroriga yana bir band qo‘shildi. Unga ko‘ra, shtatdagi xodimlarining 50 foizi nogironligi bo‘lgan shaxslardan tashkil topgan jamoat birlashmalari korxonalari jami xodimlarning mehnatiga haq to‘lash fondi uchun yagona ijtimoiy to‘lov stavkasi 4,7 foiz miqdorida belgilanadi va yagona ijtimoiy to‘lov summasi belgilangan tartibda taqsimlanadi.