Oliy Majlis Senati nizosiz talablarni hal etishni soddalashtirishga oid qonunni maʼqulladi.
Unga koʻra, qonunda belgilangan mezonlarga mos, bazaviy hisoblash miqdorining ming baravari (440 mln soʻm)gacha boʻlgan nizosiz talablar boʻyicha notariusga murojaat qilish imkoniyati yaratiladi.
Bu orqali bunday talablarni sud tartibiga murojaat qilmasdan, notarius orqali rasmiylashtirish va ijroga qaratish mexanizmi soddalashtiriladi.
Mazkur qonunning quyi palatadagi muhokamasida quyidagilarga oid qarzdorliklar boʻyicha nizosiz talablar haqida soʻz borgandi:
ijara toʻlovlari;
koʻp kvartirali uylardagi joylarning mulkdorlaridan majburiy badallar va toʻlovlar;
kommunal xizmatlar;
aloqa xizmatlari.
Sanab oʻtilgan toʻlovlardan qarzdorlikni undirish bilan bogʻliq talablarning miqdori bazaviy hisoblash miqdorining ming baravaridan koʻp boʻlgan taqdirda, amaldagi taomil asosida – sud tomonidan, buyruq tartibida koʻrib chiqiladi. BHMning ming barobaridan kam boʻlgan nizosiz talablarga doir ishlar esa notariuslar tomonidan koʻrib chiqiladi.
Senat matbuot xizmati xabariga koʻra, 10-sentabr kuni maʼqullangan qonunga binoan notariuslar tomonidan rasmiylashtiriladigan QR-kodli ijro xatlari elektron shaklda ijro organlariga toʻgʻridan toʻgʻri yuboriladi. B – hujjatlarni qogʻoz shaklida taqdim etish bilan bogʻliq ortiqcha jarayonlarni qisqartiradi.
Bundan tashqari, Iqtisodiy protsessual kodeksiga oʻzgartirishlar kiritilib, qonuniy kuchga kirgan sud hujjati ustidan shikoyat qilinganda uning ijrosini yuqori instansiya sudida toʻxtatib turish mexanizmi takomillashtirilmoqda. Bunda ijroni toʻxtatib turishni soʻragan shaxs bunday chora koʻrilmasa, qaytarma ijroni qiyinlashtirishi yoki uni bajarib boʻlmaydigan qilib qoʻyishi mumkinligini asoslashi lozim boʻladi.
Senatorlarga koʻra, bu oʻzgartishlar sudlarning ish yuklamasini kamaytiradi, fuqarolar va tadbirkorlik subyektlarining vaqti va xarajatlarini tejaydi, nizosiz talablarni tezkor rasmiylashtirish hamda ijro samaradorligini oshirishga xizmat qiladi.
