O‘zbekiston Respublikasi Innovatsion rivojlanish vazirligi hamda Avstriyaning Vena tibbiyot Instituti hamkorligida joriy yilning 22 oktabr kuni InnoWeek xalqaro innovatsion g‘oyalar haftaligi doirasida yurtimizda ilk bora Toshkent shahrida 2 ta eng so‘nggi avlod VPPS 2010 ekologik gulchangi qopqonlari o‘rnatilgani munosabati bilan taqdimot bo‘lib o‘tdi. Bu haqda Innovatsion rivojlanish vazirligi matbuot xizmati xabar bermoqda.
«Endi poytaxt aholisida mavsumiy allergiyalarni nazoratga olish imkoniyati paydo bo‘ladi. Bunda hozircha poytaxtning ikki nuqtasiga o‘rnatilgan gulchangi monitoringi stansiyalari yordam beradi. Ayni kunlarda Mirzo-Ulug‘bek tumanida joylashgan Doktor Maksudova innovatsion klinikasi hamda Olmazor tumanidagi Ilg‘or texnologiyalar markaziga o‘rnatilgan gulchangi qopqonlari gullagan o‘simliklarning changlariga bo‘lgan allergiyani nazorat qilish imkonini beradi», - deyiladi xabarda.
Ta'kidlash joizki, bugungi kunda dunyo aholisining 20 foizi allergiyadan aziyat chekadi. Bu turli ko‘rinishlarda – tumov, kon'yunktivit, teri qichishishi va qizarishi, hatto, bronxial astma ko‘rinishida namoyon bo‘lishi mumkin. Hozirgacha aholimiz havo changlanganini allergiya alomatlari paydo bo‘lganidan keyingina bilib olardi. Gulchangi monitoringi esa allergiya mavsumining boshlanishini oldindan aytib berish, bu esa o‘z navbatida kasallik rivojlanishining alomatlari keskinlashishining oldini olish imkonini yaratadi.
Ta'kidlanishicha, gulchangi qopqonlarida yig‘ilgan changlar laboratoriya sharoitida kuchli mikroskoplar orqali tekshiriladi va tekshiruv natijalari o‘pkamizga tushishi mumkin bo‘lgan changlar haqida to‘liq tasavvur beradi. Tahlillar natijalari 2019 yildan boshlab, Innovatsion rivojlanish vazirligining rasmiy saytida e'lon qilib boriladi.
Allergolog-shifokorlarning fikricha, aynan ma'lum mavsumlarda shifokorlarga murojaat qiladigan bemorlarning aksariyati allergiyadan aziyat chekadilar. Gulchangi qopqonlari yordamida olingan ma'lumotlar orqali shifokorlar mavjud allergenlar doirasini toraytirishi mumkin, bu esa o‘z navbatida tekshiruvlarga kamroq vaqt va mablag‘ sarflanishiga, tez va aniq tashxis qo‘yilishiga olib keladi.
