Milliy gvardiya institutiga o‘qishga kiruvchi nomzodlarni dastlabki tanlash qanday o‘tkaziladi?

Normativ-huquqiy hujjatlar loyihalari muhokamasi portalida Milliy gvardiya, Mudofaa vazirligining “O‘zbekiston Respublikasi Milliy gvardiyasi Harbiy-texnik institutiga o‘qishga kiruvchi nomzodlarning dastlabki tanlash tadbirlarini o‘tkazish tartibi to‘g‘risidagi nizomni tasdiqlash haqida”gi qarori loyihasi joylashtirildi.

O‘zbekiston Respublikasi Milliy gvardiyasi Harbiy-texnik institutiga o‘qishga kiruvchi nomzodlarning dastlabki tanlash tadbirlarini o‘tkazish tartibi to‘g‘risidagi nizomga ko‘ra, o‘qishga kirish uchun arizalar (bildirgilar) qabul yilining 1 fevralidan 1 apreliga qadar qabul qilinadi.
Institutga o‘qishga kirishni xohlagan nomzodlar tomonidan mudofaa ishlari bo‘yicha bo‘limlarga quyidagi hujjatlar taqdim etiladi:

ariza (bildirgi);
pasport nusxasi;
tug‘ilganlik haqida guvohnoma nusxasi;
chaqiriluvchining qayd etilganligi to‘g‘risidagi guvohnomasi yoki harbiy guvohnomasi;
nomzod tomonidan qo‘lda yoki kompyuterda yozilgan tarjimai hol;
anketa;
o‘qish, ish, xizmat o‘tash joyidan (agar o‘qiyotgan, ishlayotgan, xizmatni o‘tayotgan bo‘lsa) tavsifnoma;
ota-onasining ish joyidan ma'lumotnoma (agar ishlayotgan bo‘lsa);
ma'lumoti to‘g‘risidagi (umumiy o‘rta, o‘rta maxsus, kasb-hunar) hujjatlar (asli va nusxasi) hamda reyting daftarchasi (baholar tabeli) nusxasi;
oliy harbiy ta'lim muassasalariga o‘qishga kirishda imtiyozlardan foydalanish huquqini tasdiqlovchi hujjatlar (asli va nusxasi);
yaqin qarindoshlar orasida vafot etganlar bo‘lsa, ularning o‘limi haqida guvohnomaning nusxasi;
3 x 4 sm o‘lchamdagi 6 ta fotosurat (bosh kiyimsiz va burchaksiz) hamda 4,5 x 6 sm o‘lchamdagi 4 ta fotosurat (bosh kiyimsiz);
nomzodning yashash joyidagi hududiy ichki ishlar organidan jinoiy javobgarlikka tortilmaganligi va sudlanmaganligi to‘g‘risidagi ma'lumotnoma (kontrakt bo‘yicha harbiy xizmatchilar mazkur ma'lumotnomani taqdim qilishi talab etilmaydi).

Dastlabki tanlash davomida quyidagi tadbirlar tashkil etiladi va o‘tkaziladi:

hujjatlarni to‘plash va o‘rganish;
yakka tartibda suhbatlashish;
individual-psixologik o‘rganish;
umumjismoniy tayyorgarlik ko‘rganligini baholash;
tibbiy ko‘rikdan o‘tkazish.

Dastlabki tanlash tadbirlari ikki bosqichda o‘tkaziladi.

Birinchi bosqich fuqaro yoshlar uchun – yashash joyidagi tuman (shahar) mudofaa ishlari bo‘yicha bo‘limlarida, «Temurbeklar maktabi» harbiy-akademik litseylari va Milliy gvardiya Respublika ixtisoslashtirilgan musiqa akademik litseyi bitiruvchilari uchun – ular joylashgan hududdagi tuman (shahar) mudofaa ishlari bo‘yicha bo‘limlarida, harbiy xizmatchilar va huquq-tartibot organlari xodimlari uchun – o‘z xizmat o‘tash joyida qabul yilining 1 fevralidan 31 martiga qadar amalga oshiriladi hamda ushbu bosqichda quyidagi tadbirlar tashkil etiladi va o‘tkaziladi:

hujjatlarni to‘plash va o‘rganish;
yakka tartibda suhbatlashish;
birlamchi tibbiy ko‘rikdan o‘tkazish.

Ikkinchi bosqich fuqaro yoshlar, harbiy xizmatchilar va huquq-tartibot organlari xodimlari uchun mudofaa ishlari bo‘yicha boshqarmalarda qabul yilining 1 aprelidan 31 mayiga qadar amalga oshiriladi hamda ushbu bosqichda quyidagi tadbirlar tashkil etiladi va o‘tkaziladi:

individual-psixologik o‘rganish;
umumjismoniy tayyorgarlik ko‘rganligini baholash;
takroriy tibbiy ko‘rikdan o‘tkazish.