Tez orada «Real» bosh murabbiyi bo‘lishi kutilayotgan Antonio Kontening «qirollik klubi»dagi birinchi transfer maqsadi aniq, deb yozmoqda Calciomercato.
Nashrning aniqlashicha, italiyalik mutaxassis «Manchester Yunayted»dan Pol Pogbani yangi jamoasida ko‘rish istagida. O‘z navbatida, madridliklar rahbariyatining ham bundan xabari bor va ular bu transferni amalga oshirish qiyinchilik tug‘dirmaydi, deb hisoblashmoqda. «Real»da ushbu nomzodni xarid qilish masalasi Zinedin Zidanning iste'fosiga qadar ham kun tartibida bo‘lgani aytiladi.
Shu bilan birga, manbaga ko‘ra, «Qaymoqranglilar» «Chelsi» hujumchisi Eden Azar bilan bog‘liq vaziyatni ham kuzatishda davom etmoqda. Belgiyalik futbolchi hozirga qadar bir necha marotaba «Real»ga o‘tish istagi borligini ochiq aytib keladi.
Eslatib o‘tamiz, kecha «Real» rahbariyati yig‘ilishida Xulen Lopetegi bosh murabbiy lavozimidan ozod etilgan, uning o‘rniga «Kastilya» ustozi Santyago Solari vaqtincha bosh murabbiy vazifasini bajaruvchi etib tayinlangan edi.
