“O‘zbekinvest” kompaniyasi 2018 yilda 26,5 mlrd. so‘mdan ortiq sug‘urta qoplamasini to‘lab berdi

O‘zbekiston Respublikasi Prezidenti Shavkat Mirziyoyev tomonidan olib borilayotgan islohotlar natijasida iqtisodiyotning barcha sohalari, xususan, sug‘urta sohasi ham jadal rivojlanmoqda. Jahon standartlariga mos, zamonaviy sug‘urta xizmatlarining taklif etilishi tadbirkorlik sub'yektlari faoliyatining barqaror rivojlanishiga, aholi mol-mulki va sog‘lig‘i himoyasiga ijobiy ta'sir etadi.

O‘zbekiston sug‘urta bozorining rivojlanishi jarayonida “O‘zbekinvest” milliy sug‘urta kompaniyasi faoliyatida 2018 yilning o‘tgan 9 oyi davomida qator ijobiy natijalarga erishildi, bu haqda kompaniya axborot xizmati xabar qilmoqda.

Sug‘urta xizmatlari sifatini oshirish va hududlarda faoliyat geografiyasini kengaytirish, agentlik tarmog‘ini rivojlantirish, yangi, dolzarb sug‘urta mahsulotlarini joriy etish hamda jismoniy va yuridik shaxslar kesimida faol sug‘urta faoliyatini yuritish natijasida 137 mlrd. so‘m hajmda sug‘urta mukofotlari yig‘ildi va bu ko‘rsatkich o‘tgan yilning shu davriga nisbatan 2,5 barobar ortiq bo‘ldi. Ixtiyoriy sug‘urta turlari bo‘yicha yig‘ilgan sug‘urta mukofotlari hajmi 2017 yilning shu davri bilan taqqoslaganda 2,7 barobarga o‘sib, 114,2 mlrd. so‘mni tashkil etdi.

Mijozlar bilan tuzilgan sug‘urta shartnomalari bo‘yicha 73 trln. so‘m yoki 9 mlrd. AQSh dollari ekvivalentidagi sug‘urta majburiyatlari olingan.

Sug‘urta hodisasi yuz berganda mijozlarning da'volarini imkon qadar tez ko‘rib chiqib, ularning mol-mulki yoki sog‘lig‘iga yetgan zararni o‘z vaqtida qoplab berish “O‘zbekinvest” kompaniyasi faoliyatining muhim yo‘nalishlaridan biri hisoblanadi. Joriy yilning o‘tgan 9 oyi davomida kompaniya tomonidan 7400 ga yaqin sug‘urta da'volari ko‘rib chiqilib, ular bo‘yicha jami 26,5 mlrd. so‘mdan ortiq sug‘urta qoplamasi to‘lab berildi.

2018 yilda jismoniy shaxslar bilan ishlash bo‘yicha yondashuvning tubdan yaxshilash hamda shahar va qishloq aholisini sug‘urtaning ixtiyoriy va majburiy turlariga faol jalb etishga qaratilgan chora-tadbirlar natijasida jismoniy shaxslar kesimida 19 mlrd. so‘m yoki o‘tgan yilning shu davriga qaraganda 2,3 barobar ko‘p sug‘urta mukofoti yig‘ish ta'minlangan. Shu bilan birgalikda, hududlarda, ayniqsa, chekka qishloqlarda ham sug‘urta faoliyatini rivojlantirish bo‘yicha tadbirlar amalga oshirildi.

Qabul qilingan chora-tadbirlar natijasida joriy yilning 9 oyida 12 ta yangi hududiy sug‘urta bo‘limlari ochildi, hududiy filiallar tomonidan 52 mlrd. so‘m yoki 2017 yilning shu davri bilan taqqoslaganda 1,5 barobar ko‘p sug‘urta mukofotlari yig‘ildi. Tumanlardagi sug‘urta bo‘limlari tomonidan yig‘ilgan sug‘urta mukofolari hajmi 1,7 barobarga o‘sib, 25 mlrd. so‘mni tashkil etdi.

Marketing strategiyasini faollashtirish natijasida mijozlar soni o‘sishi kuzatilmoqda, jismoniy shaxslar bilan tuzilgan sug‘urta shartnomalari soni 250 276 tani tashkil etib, bu ko‘rsatkich o‘tgan yilning shu davriga nisbatan 212 foizga o‘sgan.

Ta'kidlash kerakki, “O‘zbekinvest” kompaniyasi ko‘p yillardan buyon kreditlar va investitsiyalarni sug‘urtalovchilar Xalqaro ittifoqi – Bern ittifoqining to‘la huquqli a'zosidir. Bern ittifoqi dunyo bo‘yicha eksport kreditlari va investitsiyalarni sug‘urtalash bo‘yicha agentliklarning jahon assotsiatsiyasi hisoblanadi. Ushbu ittifoq dunyoning 70 dan ortiq mamlakatidan 83 ta tashkilotni birlashtiradi.

Faol xalqaro sug‘urta faoliyatini amalga oshirish natijasida O‘zbekiston Respublikasini rivojlantirish Davlat dasturlari doirasida AQSh, Yaponiya, Koreya, Rossiya Federatsiyasi, Shveytsariya va boshqa mamlakatlar xorijiy investorlari va pudratchilari tomonidan O‘zbekistonda amalga oshirilayotgan loyihalar bo‘yicha kompaniya tomondina qabul qilingan sug‘urta majburiyatlari hajmi 21,7 mlrd. AQSh dollarni tashkil etdi. Ushbu majburiyatlar 2024 yilgacha amalda bo‘ladi.

Shu bilan birga, “O‘zbekinvest” kompaniyasi Navigators Insurance Company (AQSh), Lancashire Insurance Company Limited (Buyuk Britaniya), Tokio Marine & Nichido Fire Insurance Co. Ltd. (Yaponiya), Allianz SE va HDI Global Network AG (Germaniya), AXA (Fransiya), People Insurance Company of China (Xitoy), Korean Reinsurance Company (Koreya), “Ingosstrax”, “Sogaz” (Rossiya), Zurich Insurance Group (Shveytsariya) kabi dunyo sug‘urta kompaniyalarining birinchi o‘ntaligiga kiruvchi yetakchi transmilliy sug‘urta kompaniyalari bilan faol hamkorlik qilmoqda.

2015 yilda “Moodyʼs Investors Services Ltd.” xalqaro reyting agentligi (Buyuk Britaniya) “O‘zbekinvest” kompaniyasining xalqaro moliyaviy barqarorlik reytingini “barqaror” progonozi bilan B1 dan Ba3 ga ko‘tardi. Shunday qilib, “O‘zbekinvest” kompaniyasi respublika moliya bozorida eng yuqori xalqaro reytingga ega bo‘ldi.

Kompaniyaga 2017 yil yakunlari bo‘yicha “Saipro” reyting agentligi tomonidan “Eng yaxshi moliyaviy ishonchlilik” (uzA++) reytingi berilgan.

Sug‘urta bozoridagi raqobatning kuchayib borayotgani, shuningdek, taqdim etilayotgan sug‘urta xizmatlari soni va sifatiga mijozlarning talabidan kelib chiqib, “O‘zbekinvest” kompaniyasi dunyo sug‘urta bozorining ilg‘or va innovatsion tajribalarini o‘rgangan holda o‘z faoliyatini davom ettirish va o‘z mijozlarining shaxsiy va mulkiy manfaatlariga ishonchli kompleks sug‘urta himoyasini taqdim etishni maqsad qilgan.