Tadbirda kompaniya rahbariyati va xodimlari, shuningdek, mehmon sifatida taniqli oʻzbek yozuvchisi Nurali Qobul ishtirok etdi.
Oʻzbek tilining milliy oʻzlikni anglash va tarixiy xotirani saqlashdagi oʻrni, mumtoz va zamonaviy adabiyotimizning ona tilimiz rivojiga qoʻshgan hissasi tadbirdagi asosiy mavzulardan boʻldi. Ayniqsa soʻnggi yillarda mamlakatimizda davlat tilining nufuzini yuksaltirish, uni ijtimoiy-siyosiy hayotning barcha sohalarida toʻlaqonli qoʻllash, davlat organlari va tashkilotlarida ish yuritishni davlat tilida samarali tashkil etish hamda davlat tili toʻgʻrisidagi qonunchilik talablariga soʻzsiz rioya etilishini taʼminlashga alohida eʼtibor qaratilayotgani taʼkidlandi. Shu bilan birga, oʻzbek tilining davlat va jamiyat hayotidagi oʻrni, uning amalda keng qoʻllanishi masalalari xalqaro miqyosda ham eʼtibor qaratilayotgan mavzulardan biri ekani qayd etildi.
Dasturdan oʻrin olgan davra suhbatida yozuvchi Nurali Qobul bilan xalqimizning boy tarixiy va madaniy merosini kelajak avlodlarga yetkazish, ajdodlarimiz qoldirgan maʼnaviy boylikni qadrlash hamda adabiyotning jamiyat hayotidagi ahamiyati xususida fikr almashildi. Shuningdek, adibning ijodiy faoliyati va asarlarida tarixiy voqealarning badiiy talqini haqida soʻz yuritildi. Kompaniya xodimlari oʻzlarini qiziqtirgan savollar bilan yozuvchiga murojaat qilishdi.
Bayram tadbiri doirasida kompaniya xodimlari oʻrtasida Alisher Navoiy gʻazallarini aytish boʻyicha mushoira hamda oʻzbek adiblarining nasriy asarlaridan oʻqilgan parchalar asosida ularning mualliflarini aniqlashga bagʻishlangan adabiy viktorina oʻtkazildi. Gʻoliblar sovrinlar bilan taqdirlandi.
Kompaniyada shakllangan anʼanaga muvofiq, barcha xodimlarga oʻzbek mumtoz va zamonaviy adabiyoti namunalaridan iborat kitoblar sovgʻa qilindi.
Koll-markaz: (+998) 71−207−60−00, 1160
Sayt | Facebook | Instagram | Telegram | YouTube
Reklama huquqi asosida
