Messining omadsiz qaytishi va yuqoriga intilayotgan Solari. Ispaniyada tur o‘yinlari
|22:40 / 12.11.201811 81216 min
Dam olish kunlarida Ispaniya chempionatida 12-tur uchrashuvlari o‘tkazildi. Bu turda Messi «Barselona»da qaytishini amalga oshirdi, «Real» Solari qo‘li ostida qatorasiga to‘rtinchi uchrashuvda ham g‘alaba qozondi.
Messisiz hammasi joyida edi
Lionel Messi 20 oktabr kuni «Sevilya»ga qarshi o‘yinda o‘ng yelkasidan jarohat olib, 3 haftaga safdan chiqishi jamoaning natijalariga salbiy ta'sir ko‘rsatmadi. Kataloniyaliklar asosiy yetakchisisiz o‘tgan 5 o‘yinda 4 g‘alabaga erishdi, jumladan el-klasikoda «Real» yirik hisobda mag‘lub etildi, YeChLda «Inter»ga qarshi o‘yinlarda 4 ochko olindi, jamoa Ispaniya chempionatida birinchi o‘rinni saqlab qoldi, YeChLda pley-off yo‘llanmasini muddatidan oldin hal qildi.
Leoning qaytishi
Argentinalik futbolchi kutilganidan bir hafta oldinoq mashg‘ulotlarga kirishgan, u «Inter»ga qarshi javob uchrashuvida maydonga tushishi kutilgandi. Ammo o‘yindan bir kun oldin shifokorlar tavakkal qilishni istashmadi va uning o‘ynashiga ruxsat berishmadi. Messi jamoa bilan Milanga bordi, ammo Valverde uni o‘yin qaydnomasiga kiritmadi. La Liganing navbatdagi o‘yinida esa u boshlang‘ich tarkibda o‘ynaydigan bo‘ldi.
Malkom startda
Mavzuga oid
Messi bilan birga Malkom ham «Betis»ga qarshi o‘yinning asosiy tarkibidan o‘rin oldi. Ushbu braziliyalik Milandagi o‘yinda o‘zini ko‘rsatgan va to‘pga birinchi teginishidayoq hisobni ochgandi. Dembelening navbatdagi mashg‘ulotga ham kechikib kelishi va Koutinoning kichik jarohat olishi Malkom uchun asosiy tarkibga eshik ochdi. Yozda «Roma»ning «burni ostidan ilib ketilgan» «Bordo»ning sobiq futbolchisi Ispaniya chempionati o‘yinida ilk marta boshlang‘ich tarkibga kiritildi.
«Barselona»ning pressingi
Braziliyalik futbolchi ilk daqiqadayoq golli pas muallifi bo‘lishi mumkin edi, uning chap qanotdan bergan uzatmasi Messining zarbasi bilan yakunlandi, ammo to‘p yo‘liga mehmonlar jamoasi himoyachisi to‘g‘anoq bo‘ldi. «Barsa» hakamning o‘yin boshlangani haqidagi hushtagi yangrashi bilanoq yuqori pressing uyushtira boshladi. Ammo «Betis» futbolchilari va darvozaboni xotirjam harakat qilishdi. Kuchli bosim ostida ham mehmonlar bir-birlariga aniq to‘p uzatishlarni amalga oshirishda davom etishdi.
Maydon egalari o‘zlariga ishonib o‘ynashar, futbolni sog‘inib qolgan Messi doimiy ravishda to‘p bilan muomala qilardi. U Suares va Langleni bir martadan zarba berish holatiga chiqardi, ammo «Betis» darvozaboni Pau Lopes («Barselona»ning ashaddiy raqiblaridan biri bo‘lmish «Espanol» klubi tarbiyalanuvchisi) har ikki vaziyatda ishonchli harakat qildi.
Ogohlik qo‘ng‘irog‘i
O‘ziga haddan ortiq ishonib yuborish mezbonlarga qimmatga tushdi. Katta kuch bilan oldinga o‘tgan «Barselona» orqada katta bo‘shliq qoldirdi - Pike himoyaga qaytishga ulgurmadi, qarshi hujumda muvaffaqiyatli harakatlangan Lo Selso jarima maydoniga yorib kirib, zarba berdi, ammo to‘pni qaytarishga ulgurgan himoyachilardan biri maydon tashqarisiga chiqarib yuborishga ulgurdi. Sevilyaliklarning argentinalik yarimhimoyachisi o‘yinning eng faol futbolchisiga aylandi va yana bir golli vaziyat yuzaga keltirdi. Bu safar Xoakin u tashlab bergan to‘pni darvozaga aniq yo‘llay olmadi. «Barselona» bu hujumni ogohlik qo‘ng‘irog‘i sifatida qabul qilishi kerak edi, ammo bunday bo‘lmadi.
Ikki karra jazolash
Foto: Xavier Bonilla/NurPhoto via Getty Images
«Betis» 15 daqiqa ichida ko‘k-anorranglilarni ikki marta jazoladi. Taniqli «futbol shaxmatchisi» bo‘lmish Seten sevilyaliklar jamoasining kombinatsion o‘yinini yaxshi qura olganini namoyish qildi. U o‘yindan oldin Yohan Kroyfning «Barselona»si namoyish etgan futbolga qo‘ygan muhabbatini tan olgandi. Niderlandiyalik dahoning ispaniyalik mutaxassisga qanchalik ta'sir ko‘rsatgani o‘yin davomida ko‘rinib turdi.
Birinchi gol chap qanotda Karvalyu Firponi qulay vaziyatga chiqarishi ortidan urildi. Yosh qanot himoyachisi Robertoni dog‘da qoldirib, ter Shtegenning yaqin burchagini aniq nishonga oldi. Ikkinchi golni esa «Barselona»ning sobiq futbolchisi Teloning qanotdan uzatmasidan keyin Xoakin urdi. Tanaffus arafasida tabloda 0:2 hisobi porlab turardi, mehmonlar foydasiga.
Ikkinchi bo‘limdagi rok-n-roll
Valverde tanaffusdayoq o‘zgarish qilishni boshladi. Vidalning maydonga chiqishi jamoaning harakatchanligini oshirdi, «Betis»ning kuchlari tugayotgandek ko‘rina boshladi. 67-daqiqada Telo Albani jarima maydoni hududida yiqitdi va belgilangan penaltini Messi aniq ijro etdi.
«Barsa» hisobni tenglashtirish uchun katta kuch bilan oldinga tashlandi, ammo bir necha daqiqa o‘tib ikki to‘plik farq tiklandi. Lo Selso darvozabonning o‘ziga qaratib yengilgina zarba yo‘llagandi, ammo ter Shtegen barchani hayron qoldirib, to‘pni o‘tkazib yubordi. Shu ondan boshlab maydonda rok-n-roll boshlanib ketdi.
«Barsa» tez orada javob qaytardi, Messining Munirga a'lo darajada pasidan keyin zarba bermagan hujumchi to‘pni Vidalga qoldirdi - kataloniyaliklar hisobni yana qisqartirishdi. Ammo o‘yin yakunlanib borayotgan pallada Rakitichning maydondan chetlatilishi - u raqib hujumini qo‘pol ravishda to‘xtatgani uchun haqli tarzda ikkinchi sariq kartochka bilan jazolandi - ko‘k-anorranglilarning kayfiyatiga ta'sir ko‘rsatdi. Ko‘p o‘tmay mehmonlar to‘rtinchi golni urishdi, bu safar Kanales aniq harakat qildi.
Leoning dubli
Bu o‘yinni qutqarib qolishning imkoni qolmagandi. Qo‘shimcha daqiqalarda Messi yana bir gol urdi, bu vaziyatda videotakrordan foydalanildi. Ammo «Barsa»ning bundan ortig‘iga kuchi ham, vaqti ham qolmagandi. Ko‘k-anorranglilar chempionatda ikkinchi marta mag‘lubiyatga uchradi.
3:4. Kataloniyaliklar uy uchrashuvlarida mag‘lub bo‘lmaslik bo‘yicha 43 uchrashuv davom etgan seriyani to‘xtatishdi. FIFA kunlari munosabati bilan yuzaga keladigan tanaffus Valverde uchun ko‘p narsani o‘ylab olishga imkon yaratishi mumkin.
«Betis» va Seten esa - tur qahramonlari bo‘lishdi.
«Murabbiy vazifasini vaqtincha bajaruvchi»
28 oktabr kuni «Real» klasiko bahsida sharmandalarcha mag‘lub bo‘ldi (1:5), shundan keyin Xulen Lopetegi o‘rniga o‘rinbosarlar jamoasi murabbiyi Santyago Solari vaqtincha bosh murabbiy etib tayinlandi. Argentinalik mutaxassisga ikki hafta muhlat berilgandi, bu muddat yakunlangach, «Qirollik klubi» rahbariyati bosh murabbiyni tanishtirishi kerak edi. Ko‘rinib turibdiki, Solari rasman bosh murabbiy etib tayinlanadi. Ayni vaqtda klub rahbariyati qaysidir mutaxassis bilan muzokaralar olib borayotgani to‘g‘risidagi xabarlar ham tinchib qolgan.
To‘rt imtihon
Bu ikki hafta ichida argentinalik mutaxassis 4 o‘yinga jamoani boshlab borishi belgilangandi. Birinchi o‘yin nisbatan oson edi - Ispaniya Kubogida «Melilya» mag‘lub etildi (4:0). Keyin esa ichki chempionatda «Valyadolid» (2:0) va «Selta» (4:2), Chempionlar ligasida esa «Viktoriya» Plzen klublari taslim etildi (5:0).
Qo‘shimcha motivatsiya
«Real» bungacha Solari boshchiligidagi 3ta o‘yinda bitta ham gol o‘tkazmagandi - 11:0. To‘rtinchi o‘yin eng murakkabi edi - «Vigo»da keltlarga qarshi. O‘tgan mavsumda «Selta» «Real»ga qarshi o‘z uyidagi o‘yinda ochko olgandi (2:2), bu mavsumda esa «Balaidose»da «Atletiko»ni mag‘lubiyatga uchratishga ulgurdi (2:0). Galisiyaliklar odatda La Liganing boshqa o‘yinlarida yorqin o‘yin ko‘rsatishmaydi, grandlar bilan o‘yinlarda esa qo‘shimcha motivatsiya bilan harakat qilishadi. Shu tufayli, madridliklar muxlislarida bu o‘yindan avval jiddiy xavotir bor edi.
Jarohatlar
O‘yin boshidayoq muammolar yuzaga keldi. Maydon egalari keskin o‘yin ko‘rsatishdi va o‘yin boshlanganiga 20 daqiqa bo‘lmay turib, navbatdagi qo‘pollikdan keyin Solari ilk majburiy o‘zgarishni amalga oshirdi - ortdan podkat berilishi tufayli Kazemiro safdan chiqdi va uning o‘rnida maydonda Sebalos paydo bo‘ldi. Birinchi bo‘lim oxirida esa Regilon cho‘loqlana boshladi va uning o‘rniga Xavi Sanches tushirildi. «Real» lazaretidagi Marselo, Varan va Karvaxal qatoriga yana bir himoyachi borib qo‘shiladigan bo‘ldi.
Benzemaning faolligi
Bu vaqtga kelib mehmonlar hisobni ochib ulgurishgandi. Modrichning pasidan keyin Benzema bir urinishda darvozani ishg‘ol qildi. Bu gol fransiyalik hujumchi uchun chempionatdagi beshinchi gol bo‘ldi. Tanaffusdan keyin u jamoasining yana bir golida ishtirok etdi, uning zarbasidan keyin to‘p darvoza ustunidan qaytib, raqib himoyachisi Kabralning boshiga tegdi va darvoza to‘riga borib tushdi. «Qirollik klubi» ishonch bilan o‘yinni nazorat qila boshladi.
Himoya muammolari
Ammo «Selta» o‘z uyida qo‘l ko‘tarib taslim bo‘la olmasdi. Kabralning avtogolidan 5 daqiqa o‘tib hisob qisqardi - Malo jarima maydoniga yorib kirib, qanotdan uzatilgan to‘pni Kurtuaning uzoq burchagiga yo‘lladi. Ko‘p o‘tmay Solari uchinchi marta majburiy o‘zgarishni amalga oshirdi - jarohat olgan Nacho o‘z o‘rnini Asensionga bo‘shatib berdi. Vaskes esa chap qanotga o‘tib harakatlana boshladi.
O‘yinda hal qiluvchi vaziyat mezbonlar darvozasiga penalti belgilanishi bo‘ldi. Ramos uchinchi golni urdi. O‘yin oxirida Sebalos hisobni yirik ko‘rinishga keltirdi (bu vaqtga kelib o‘yin antiqahramoni Kabral ikkinchi sariq kartochkani olib, maydonni tark etgandi). O‘yinga qo‘shib berilgan daqiqalarning oxirida Brais hisobni qisqartirdi. 4:2, Solari ikki haftalik muddatni muvaffaqiyatli o‘tkazdi 4 o‘yinda 4 g‘alaba, to‘plar nisbati 15:2. Madridliklar bu mavsumda hali qatorasiga to‘rt o‘yinda g‘alaba qozonishmagandi.
Ehtimol, «Real» prezidenti Florentino Peres yangi murabbiyni tanlash vaqtida buni unutmas. Solari «qaymoqranglilar» boshqaruvida kamida shu mavsum oxirigacha qolishga haqli. Bu murabbiy nomzodini bir qator futbolchilar ham faol qo‘llab-quvvatlashmoqda.
Taslim bo‘lmas Diyego Godin «Atletiko»ga qo‘shimcha daqiqalarda g‘alaba keltirdi. Bungacha u yarim soat davomida maydonda jarohati bilan harakat qildi.
O‘yinning 64-daqiqasida madridliklar jamoasining urugvaylik sardori Inyaki Uilyams ikkinchi golni urish uchun ketayotganida uni ta'qib eta turib belidan jarohat oldi. Ammo bu vaqtga kelib, «Atletiko» 3 nafar futbolchini almashtirib bo‘lgandi.
32 yoshli futbolchi maydonda qoldi. Murabbiy uni hujumga jo‘natdi. 91-daqiqada birinchi golni o‘ziga xos uslubda uzoq masofadan urgan Parti jarima zarbasini ijro etdi. Uning pasini Antuan Grizmann Godinga qulay qilib tashlab berdi va himoyachi g‘alaba golini oqsoqlangancha nishonladi.
«Uilyams bilan birga chopganimdan keyin belimda qattiq og‘riq his qildim. Men ketishga chog‘lanib, sardorlik bog‘ichini Antuanga bermoqchi edim. Ammo bizda zaxira qolmagan ekan. Biz Cholo bilan gaplashdik va u meni hujumga qo‘yishga qaror qildi. O‘yin oxirigacha ko‘p vaqt bor edi va men hali jamoaga yordam bera olaman deb o‘yladim. Endi tekshiruv natijalarini kutamiz, men kamida bir oyga safdan chiqqan bo‘lsam kerak. Men o‘z tanamni bilaman, jarohatni jiddiylashtirmaslik uchun ehtiyot bo‘lishim kerak», degan o‘yindan keyin futbolchi.
