Argentina mudofaa vaziri cho‘kib ketgan suvosti kemasini chiqarib olish uchun 4 mlrd dollar sarflanishini ahmoqlik deb atadi

Bir yil ilgari dengizda cho‘kib ketgan Argentina HDKga qarashli San Juan suvosti kemasini chiqarib olish uchun 4 mlrd dollar mablag‘ ajratilishi ahmoqona qaror bo‘ladi. Mamlakat mudofaa vaziri Oskar Aguad ana shunday fikr bildirdi.

"Agarda rostdan ham bu 4 mlrd dollarga tushadigan bo‘lsa, bu ahmoqlik bo‘ladi. Bu mening shaxsiy fikrim, ammo Argentinada qashshoqlik darajasi 30%ni tashkil etayotgan bir vaqtda 4 mlrd dollar sarflash aqldan emas", - dedi u America TV telekanali efirida.

Vazir shu bilan birga, asosiy muammo operatsiyaning taxminiy qiymatida emas, balki suvosti kemasini 907 metr chuqurlikdan tortib oladigan texnologiyaning yo‘qligida ekanligini bildirdi.

Avvalroq Clarin gazetasi ekspertlar fikriga tayanib, suvosti kemasini tortib chiqarish operatsiyasi 3,5 mlrd dollarga tushishi mumkinligini yozgandi.

Bortida 44 nafar ekipaj a'zosi bo‘lgan San Juan suvosti kemasi 2017 yilning 15 noyabrida aloqaga chiqmay qo‘ygan. 30 noyabr kuni HDK ekipajni qutqarish operatsiyasi to‘xtatilganini e'lon qilgan, ammo kemani qidirish ishlari davom ettirilgandi.

17 noyabr kuni Argentina HDK bir yil avval cho‘kib ketgan kema AQShning Ocean Infinity xususiy kompaniyasi tomonidan topilganini ma'lum qildi.