Qozog‘istonda ichki ishlar xodimlari soni 10 foizga qisqartiriladi – Nazarboyev 

Qozog‘iston prezidenti Nursulton Nazarboyev Oqo‘rdada ichki ishlar idoralari faoliyatini modernizatsiyalash masalalari bo‘yicha yig‘ilish o‘tkazdi.

Nazarboyev yig‘ilishni ochib, huquq-tartibotni ta'minlash va jinoyatchilikka qarshi kurash masalalari alohida nazorat ostida ekanligini ta'kidlab o‘tgan.

Qozog‘iston prezidenti oxirgi 3 yil ichida mamlakatda jinoyatchilik darajasi 17,5 foizga kamayganini qayd qilib o‘tgan.

“Odamlar jinoyatchilardan himoyalanish uchun birinchi navbatda politsiyaga murojaat qiladilar. Mustaqillik yillari davomida ichki ishlarning 779 xodimi halok bo‘lgan, 2,5 mingga yaqini yaralangan. Buni yodda saqlash kerak. Shu bilan birga ichki ishlar idoralarining joriy holati jamiyatning umidlariga to‘liq javob bermaydi”, deb aytgan Nazarboyev. 

Nazarboyev politsiyachilarning fuqarolar bilan o‘zaro munosabatlarining amaldagi standartlari eskirib qolgani va zamonaviy voqeliklarni hisobga olmasligini ta'kidlab o‘tgan.  

“Ichki ishlar idoralari faoliyati jamiyat umidlarini oqlay olmayapti, fuqarolar tanqidiga uchramoqda. Odamlar o‘zlarini xavfsiz his qilmayaptilar. Busiz esa bosh maqsadimiz hisoblangan – qozog‘istonliklarning yuqori turmush tarzini ta'minlay olmaymiz. Shu sababli politsiyani darhol isloh qilishni boshlashimiz lozim”, deb so‘zlarini davom ettirgan Qozog‘iston rahbari.

Nazarboyev politsiyani modernizatsiyalashning muhimligini ta'kidlagan holda, ichki ishlar idoralari strukturasi va shtatlarni optimallashtirish hamda unga xos bo‘lmagan funksiyalardan ozod qilishni topshirgan.

“Barcha ortiqcha narsalardan xalos bo‘lib, bor e'tiborni jinoyatchilikka qarshi kurash va huquq-tartibotni saqlashga qaratish lozim. Bo‘g‘inlar otpimallashtiriladi, buning natijasida bir rahbarga 3 nafar emas, 5 nafar bo‘ysunuvchi xodim to‘g‘ri keladi. Xodimlar soni 10 foizga qisqaradi. Bu choralar politsiyachilar sonining 100 ming fuqaroga 471 nafardan 424 nafargacha kamayishiga olib keladi. Bu esa Yevropadagi o‘rtacha darajaga yaqindir. Bu orqali 16 mlrd tenge tejaladi”, deb qo‘shimcha qilgan Qozog‘iston rahbari.

Nazarboyev tejalgan mablag‘larni ichki ishlar xodimlari maoshlari va ijtimoiy himoyasini yaxshilashga yo‘naltirishni buyurgan. Qozog‘iston prezidenti, shuningdek,  qo‘shimcha ichki zaxiralarni izlash bo‘yicha tizimli ishni o‘tkazish va nosamarador ma'muriy sarf-xarajatlarni istisno qilishga ko‘rsatma bergan.