Tramp nega «qaynoq nuqtalar»ga safar qilmoqchi ekani oshkor bo‘ldi

AQSh prezidenti Donald Tramp avvalroq o‘z maslahatchilariga xorijdagi jangovar harakatlar hududida bo‘lgan amerikalik harbiylarni ko‘rib kelmoqchi ekani haqida aytgandi. Bunga uni shu kabi ishni hali biron marotaba qilmagani tufayli tanqid ostiga olishayotgani sabab bo‘ldi, deb yozmoqda The Washington Post gazetasi.

Ta'kidlanishicha, Tramp o‘z muddati davomida xorijdagi amerikalik qo‘shinlarni hali biron marta borib ko‘rmagani sababli harbiy hamjamiyatning ba'zi a'zolari tomonidan tanqidga uchragan. Bunday safarlar AQSh prezidentlari uchun an'anaga aylangandi.

«Fox News Sunday»ga bergan intervyusida Tramp «juda og‘ir ish jadvali» haqida gapirib, shu tufayli amerikalik askarlarni borib ko‘ra olmayotganini bildirgan. Biroq, uning qo‘shimcha qilishicha, oxir-oqibat qo‘shinlarni baribir ko‘rib keladi. Washington Post ma'lumotlariga ko‘ra, Trampning o‘zi boshqa sabablarni ko‘rsatgan. Ular orasida-xavfsizlik muammolari, uzoq safarlar va Iroq hamda Afg‘onistondagi urushlardan norozi ekani kabilar bor.

Nashrning qayd etishicha, so‘nggi haftalarda Tramp o‘z maslahatchilariga bunday safar kerakligi haqida gapira boshlagan. Biroq, Trampda ayni damda Iroq va Afg‘onistondagi qo‘shinlarni ko‘rib kelish bo‘yicha aniq rejalar mavjud emas, deya xabar beradi Washington Post Amerika prezidentining ba'zi maslahatchilariga tayangan holda.

Bundan tashqari, Tramp Minnatdorlik kuni munosabati bilan bayram vaqtida qo‘shinlarni ko‘rib kelishi ehtimoli juda kam, u bayramni Mar-a-Lagodagi qarorgohida o‘tkazadi, deb yozmoqda gazeta.

Eslatib o‘tamiz, avvalroq Tramp Afg‘onistonga tashrif buyurishga va'da bergandi.