Qozog‘iston bosh prokurori: O‘zbekistonga har yili o‘nlab jinoyatchilar ekstraditsiya qilinmoqda

Ostonada Qozog‘iston bosh prokurori Qayrat Kojamjarov o‘zbekistonlik hamkasbi Otabek Murodov bilan uchrashdi.

Qozog‘iston Respublikasi Bosh prokuraturasi matbuot xizmatining xabar berishicha, tomonlar tuzilgan xalqaro shartnomalar doirasida ikki tomonlama munosabatlar holatini ijobiy baholadilar, jinoiy-huquqiy sohada hamkorlik, shu jumladan, ekstraditsiya, mahkumlarni topshirish, jinoiy daromadlarni qaytarish masalalarini muhokama etdilar.

Terrorizm va diniy ekstremizmga qarshi kurashish muammolariga alohida e'tibor qaratildi.

«O‘zbekiston xalqaro hamkorlik masalasida bizning asosiy hamkorimiz bo‘lib, har yili o‘nlab jinoyatchilar ekstraditsiya qilinmoqda, jinoiy ishlar bo‘yicha zarur huquqiy yordam ko‘rsatilmoqda», - dedi Q.Kojamjarov.

Uning so‘zlariga ko‘ra, so‘nggi ikki yil mobaynida O‘zbekistondan 5 kishi, Qozog‘istondan 127 kishi ekstraditsiya qilingan. Keyinchalik jinoiy ta'qib qilish uchun O‘zbekiston tomoniga 10ta jinoyat ishi topshirildi.

O‘z navbatida, O.Murodov idoralararo hamkorlik holatiga ijobiy baho berdi va uni yanada rivojlantirishga tayyorligini bildirdi.