«O‘zbekenergo» elektr energiyasi ta'minotidagi uzilishlarga izoh berdi

«O‘zbekenergo» AJ aholining elektr energiyasi ta'minotidagi qisqa muddatli uzilishlar bo‘yicha izoh berdi.

«Mamlakatimizning olis hududlari bo‘ylab elektr energiyasi ta'minotida qisqa muddatli uzilishlar uchrab turayotgani sir emas. Bu haqda murojaat va e'tirozlarni turli ijtimoiy tarmoqlar hamda axborot saytlari orqali o‘qib turibmiz. E'tibor beradigan bo‘lsak, bunday uzilishlar va avariyaviy o‘chishlar har yili kuz-qish mavsumiga o‘tish davrida takrorlanib turadi. Albatta, buning o‘ziga yarasha sabablari bor.

Mamlakatimizdagi hozirgi vaqtda ish faoliyatida bo‘lgan energetika qurilmalari o‘tgan asrning o‘rtalarida ishga tushirilgan bo‘lib, ularning deyarli 67 foizi eskirgan. Qolaversa, mamlakatimizdagi mavjud elektrostansiyalar ham o‘tgan asrning 50-60 yillarida barpo etilgan bo‘lib, ularning aksariyatida quvvatlar allaqachon muddatini o‘tab bo‘lgan. Eng yangisi hisoblangan Taxiatosh IESning ham foydalanishga topshirilganiga 27 yildan oshdi. Qolaversa, aholi soni ortib, hududlarda yangi uylar ko‘payishi natijasida transformatordan 1,5-2 kilometrgacha uzunlikdagi elektr simlari tortilayotgani tufayli oxirgi istemolchilarimizga uzatilayotgan elektr energiyaning quvvati 220 voltga yetmayapti. Transformatorlar 600-800 metrgacha bo‘lgan hududdagi istemolchilarga 220 voltni yetkaza oladi. Buning ustiga aholining elektr energiyaga bo‘lgan ehtiyoji ham yildan yilga oshib bormoqda. Masalan, 2017 yilda iste'molchilarga 47,4 milliard kVt soat elektr energiyasi yetkazib berilgan bo‘lsa, 2018 yilda esa ushbu ko‘rsatkich 50,7 milliard kVt soatni tashkil etishi kutilmoqda.

Qolaversa, aholi tomonidan bitta fazadan boshqa fazaga o‘zboshimchalik bilan ulanishi va yuklamalarning bitta fazadan ikkinchi fazaga o‘tkazilishi ayrim joylardagi, ayniqsa, Qashqadaryo va Namangan viloyatlarida elektr kuchlanishi pasayishiga, ya'ni me'yordagi 220 voltdan tushib ketishiga sabab bo‘lyapti. Ta'mirlash va yuklamalarni fazalararo teng taqsimlash ishlari olib borilishiga qaramasdan ma'lum vaqt o‘tgach aholi yana o‘zboshimchalik bilan bir fazadan boshqa fazaga o‘tib olishi, bundan tashqari, yakka tartibda qurilayotgan ko‘plab uylarning egalari tomonidan faqat bitta faza orqali ulanishi ham ortiqcha yuklamalarni yuzaga keltirib, qisqa muddatli uzilishlarga sabab bo‘lmoqda.

Shu bois hududiy elektr tarmoqlari tomonidan aholining murojaatlari bo‘yicha ushbu holatlarni bartaraf etish, ta'mirlash va yuklamalarni fazalararo teng taqsimlash orqali kuchlanishni me'yorga keltirish ishlari olib borilmoqda.

Shu o‘rinda Prezidentimiz tomonidan 2018 yil 23 oktyabrda imzolangan «Elektr energetikasi tarmog‘ini jadal rivojlantirish va moliyaviy barqarorligini ta'minlash chora-tadbirlari to‘g‘risida»gi qarorining qabul qilinishi bu boradagi muammolarni hal etishda muhim omil bo‘lmoqda. Chunki ushbu hujjatga ko‘ra, elektr energiyasi sohasida mavjud ishlab chiqarish quvvatlarini modernizatsiya qilish va yangilarini ishga tushirish bo‘yicha loyiha qiymati 2,6 milliard AQSh dollari bo‘lgan umumiy quvvati 1 984 MVt 7ta investitsiya loyihalarini amalga oshirish belgilandi. Shuningdek, jalb qilinadigan kreditlar va «O‘zbekenergo» AJning o‘z mablag‘lari hisobidan yiliga umumiy uzunligi 7,1 ming kilometr bo‘lgan yangi elektr tarmoqlarini qurish va mavjudlarini rekonstruksiya qilish, 2500ta transformator punktini o‘rnatish va modernizatsiya qilish loyihalarini amalga oshirish ishlari boshlandi.

Bundan tashqari, «O‘zbekenergo» AJ tomonidan «Obod qishloq» hamda «Obod mahalla» davlat dasturlari asosida o‘z mablag‘lari va xorijiy investitsiyalar orqali butun mamlakatimiz bo‘ylab rekonstruksiya va modernizatsiya ishlari ham jadal amalga oshirilmoqda.

Umuman olganda, olis hududlarda istiqomat qilayotgan aholining elektr energiyasi ta'minotidagi qisqa muddatli uzilishlarga barham berish borasida tizimli choralar ko‘rilmoqda», deyiladi «O‘zbekenergo» AJ matbuot xizmatining Kun.uz tahririyatiga yo‘llagan xatida.