21-sentabr kuni soat 11:18da yuk avtomobili chiqindi toʻkish maqsadida kuzovini koʻtarganda Qashqadaryo viloyatidan Samarqand viloyatiga elektr energiyasi uzatiladigan 500 kV kuchlanishli «L-527» elektr uzatish tarmogʻiga tegib ketgan. Natijada ushbu tarmoq avariyaviy oʻchgan.
Energetika vazirligining xabar berishicha, mazkur tarmoq yagona 500 kVli elektr uzatish tizimi zanjirining bir qismi hisoblanib, uning oʻchishi Buxoro viloyatidagi shamol elektr stansiyalarining ishlab chiqarish quvvatiga ham taʼsir koʻrsatgan - natijada ushbu shamol stansiyalarning ishlab chiqarish hajmi 270 MVtga kamaygan.
Energetika tizimidagi avariyaga qarshi himoya tizimlari oʻz vaqtida ishga tushib, yirik nosozliklarning oldi olingan, zaxira quvvatlar hisobiga ushbu avariya isteʼmolchilarning elektr taʼminotiga hech qanday taʼsir koʻrsatmagan.
Energetiklar tomonidan zarur choralar koʻrilib, nosozlik soat 11:37da bartaraf etilgan va elektr uzatish tarmogʻi qayta ishga tushirilgan.
Energetiklar voqea joyiga yetib borganda, avtomobil haydovchisi voqea joyida boʻlmagan.
Hodisa yuzasidan yuk avtomobili haydovchisining xatti-harakatlariga huquqiy baho berish uchun tegishli hujjatlar huquqni muhofaza qiluvchi organlarga taqdim etilgan.
