OAV: Merkel xakerlik hujumi qurboni bo‘ldi

Germaniyada vazirlar mahkamasi va partiyalar a'zolari, jurnalistlar, shuningdek, mamlakat kansleri Angela Merkel hamda federal prezident Frank-Valter Shtaynmayyer xakerlik hujumi qurboniga aylandi. Bu haqda Bild manbalarga tayangan holda xabar bermoqda.

Ta'kidlanishicha, hujumlar o‘tgan yil oktabr oyining oxiriga qadar davom etgan. Shu bilan birga, ular qachon boshlangani va kim tomonidan tashkil etilgani aniq emas. Bu holatda Rossiya va Xitoy hujumlarga aloqador bo‘lishi istisno etilmayapti. Bundan tashqari, Rossiya tomoni Germaniyaning ultrao‘ng guruhlari bilan hamkorlik qilgan bo‘lishi mumkin.

Mavjud xabarlarga ko‘ra, hozirgi vaqtda xakerlar o‘g‘irlangan ma'lumotlarning faqat bir qismini internetda joylashtirishgan. Mobil telefon raqamlari, shaxsiy elektron pochta manzillari, rasmiy va xususiy yozishmalar, maxfiy so‘zlar, shaxsiy fotosuratlar hamda hujjatlar o‘g‘irlangan. Hujum qurbonlari orasida Germaniya kansleri Angela Merkel ham bor. Hozirgi vaqtda mamlakatning barcha asosiy partiyalari orasida jabrlanganlar borligi, faqat «Germaniya uchun muqobil»da bu holat kuzatilmayotgani ma'lum.

Eslatib o‘tamiz, avvalroq Merkel partiya rahbari lavozimini tark etgani, uning o‘rnini partiya bosh kotibi egallagani xabar qilingandi.