Respublikada 74ta samarasiz faoliyat yuritayotgan Madaniyat markazlari tugatiladi – Madaniyat vaziri

O‘z ichida 9ta yo‘nalishni qamrab ol​gan milliy madaniyat to‘g‘risidagi konsepsiya soha istiqbolini belgilaydigan hujjat hisoblanadi. O‘zbekiston Respublikasi Madaniyat vaziri Baxtiyor Sayfullayev konsepsiya doirasida Vazirlar Mahkamasining 5ta qaror loyihasi, 6ta turli yo‘nalishdagi taklif ishlab chiqilib, hukumatga kiritish belgilangani ma'lum qildi, deb xabar bermoqda Kun.uz muxbiri.

Vazirga ko‘ra, 2019 — 2022 yilda yangi quriladigan, rekonstruksiya qilinadigan, kapital ta'mirlanadigan va jihozlanadigan madaniyat markazlarining manzilli ro‘yxatlari  tasdiqlandi. 

«2013 yilda shu to‘g‘risida VM qarori chiqqan bo‘lib, bunday ta'mir ishlari mahalliy hokimliklar vazifasiga kiritilgan edi. Lekin bu narsa amalga oshgani yo‘q. 2019-2020 yillarda shunga asosan 147ta obektda  ta'mirlash ishlarini amalga oshiramiz. 26 ta yangi obekt quriladi, 45 ta obekt rekonstruksiya, 26 ta obekt kapital ta'mirdan chiqadi», – deydi Sayfullayev.

Ma'lum qilinishicha, samarasiz faoliyat yuritilayotgan madaniyat markazlari faoliyatini maqbullashtirish to‘g‘risida Hukumat qarori loyihasini ishlab chiqildi. 

«Respublika bo‘yicha 74ta samarasiz faoliyat yuritayotgan markazlar tugatiladi. Ilgari binosi yaroqsiz holatga kelib qolgan markazlar boshqa binolarda faoliyat ko‘rsatardi, deyarli ishlamasdi desa ham bo‘ladi. Endi shunga ko‘ra 897ta emas, 823ta markaz qoladi. 2019 yilning 1 fevraliga qadar madaniyat markazlari to‘g‘risidagi nizom, markazlar faoliyatining samaradorligini baholash mezonlari hamda badiiy to‘garak rahbarlarini mehnat faoliyati natijasi asosida rag‘batlantirish tartibini tasdiqlash belgilangan.

2019 yilning birinchi choragida madaniyat markazlarida faoliyat samaradorligini baholash mezonlarini, to‘garak, studiya va jamoalar faoliyatini tashkil etish, pulli xizmatlarni yo‘lga qo‘yish to‘g‘risidagi nizomni tasdiqlaymiz», – deb qo‘shimcha qilgan u.