Xitoy bokschilari Andijon boks maktabi va chempionlar Hasanboy Do‘smatov, Iqboljon Xoldorovdan dars olishmoqda

Ma'lumki, ko‘p yillardan beri Andijon boks maktabi tarbiyalanuvchilari Osiyo, jahon miqyosidagi musobaqalarda yuqori o‘rinlarni egallab kelmoqda.

Shu kunlarda Andijon ixtisoslashgan olimpiya zaxiralari maktab-internatida Xitoy davlatidan kelgan bokschilar malaka oshirmoqda. Uch murabbiy, 14 nafar erkak va 4 nafar ayol bokschilardan tashkil topgan Xitoy delegatsiyasi tarkibida mamlakat chempionlari hamda sovrindorlari bor.

Maktab-internat manejidagi amaliy mahorat darslarida muassasa murabbiylari va tarbiyalanuvchilari Rio olimpiya o‘yinlari oltin medali sohibi, olimpiada chempioni Hasanboy Do‘smatov, Osiyo o‘yinlari oltin medal sohibi, Osiyo chempion Iqboljon Xoldorov va xalqaro toifadagi sport ustasi, WBC kamari mutlaq g‘olibi Azizbek Abdug‘ofurovlar ishtirok etishdi.

Shundan so‘ng, chempionlarimiz bilan “O‘zbekiston boksining dovrug‘i” mavzusida Xitoy Xalq Respublikasi sportchilari o‘rtasida davra suhbati tashkil etildi. Xorijdan tashrif buyurgan sportchilar chempion o‘g‘lonlarimizdan o‘zbek boksi haqida atroflicha ma'lumotlarga ega bo‘lishdi.

Tadbirda viloyat jismoniy tarbiya va sport boshqarmasi boshlig‘i O‘tkirbek Toshpo‘latov ishtirok etib viloyat sporti, jumladan boks sport turiga bo‘layotgan e'tibor haqida ma'lumotlar berib, xorijdan kelgan murabbiylarga esdalik sovg‘alari topshirdi.