O‘zbekiston va Indoneziya jinoiy faoliyatdan olingan daromadlarni legallashtirishga qarshi birgalikda kurashadi

Jakarta shahrida (Indoneziya) o‘tkazilgan «Egmont» guruhi yig‘ilishlari davomida 2019 yilning 30 yanvar kuni O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish Departamenti va Indoneziya Moliyaviy operatsiyalar yuzasidan axborot va tahlil markazi o‘rtasida anglashuv Memorandumi imzolandi.

Bosh prokuraturada xabarida aytilishicha, mazkur hujjat bilan jinoiy faoliyatdan olingan daromadlarni legallashtirish, terrorizmni moliyalashtirishga qarshi kurashishga qaratilgan hamkorlik shubhali moliyaviy operatsiyalar va ularni amalga oshiruvchi shaxslar to‘g‘risidagi ma'lumotlar almashish orqali amalga oshiriladi.

Hamkorlik memorandumini imzolash «Egmont» guruhining umume'tirof etilgan tamoyillarining talablari hamda jinoiy faoliyatdan olingan daromadlarni legallashtirish va terrorizmni moliyalashtirishga qarshi kurashish bo‘yicha FATF tavsiyalari asosida amalga oshirildi.

O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish Departamenti tomonidan hozirgi kunda xorijiy davlatlarning 21 ta vakolatli organlari bilan xuddi shunday hujjatlar imzolangan (AQSh, Isroil, Koreya, Polsha, Rossiya Federatsiyasi, Turkiya, Xitoy, Yaponiya va boshqalar).   

Tomonlar Memorandumning imzolanishi natijalari bo‘yicha davlatlararo erishilgan kelishuvlarning mantiqiy davomi sifatida ikki tomonlama aloqalarni yanada rivojlantirishga tayyor ekanliklarini bildirdilar.

Memorandumning imzolanishi vakolatli organlar o‘rtasida sohadagi axborot almashinuvining huquqiy asoslarini kengaytirib, ikki tomonlama hamkorlikni jonlantirishga xizmat qiladi.