Venesuela rahbariyati xorijga 73 tonna oltin sotgani hisoblab chiqildi

Venesuela prezidenti Nikolas Maduro hukumati 2018 yilda BAA va Turkiyaga 73 tonna oltin sotgan. Bu haqda mamlakat parlamentidagi muxolif deputat Karlos Paparoni ma'lum qildi. 

Uning ta'kidlashicha, Maduro ma'muriyati 4 fevraldan beri Yevropa Ittifoqi banklaridagi hisobraqamlari o‘rtasida pul o‘tkaza olmayapti.

Avvalroq muxolifat mamlakat rahbariyatini Rossiyaga 20 tonna oltin olib chiqishga urinishda gumon qilgan. Kremlda Moskvada Karakasning bunday rejalari haqida ma'lumot yo‘qligi aytilgan. Keyinroq Reuters axborot agentligi o‘z manbalariga tayanib, Venesuela hukumati BAAga 15 tonna oltin sotmoqchiligini, bu hajmdan 3 tonnasini 26 yanvarda sotib bo‘lganini ma'lum qilgan. 2 fevralda esa BAAning Noor Capital kompaniyasi Venesuela markaziy bankidan 3 tonna oltin sotib olganini ma'lum qilgan. 

Bloomberg axborot agentligi Venesuela hukumati yana 20 tonna oltin sotishni rejalashtirgani, biroq ushbu bitim jamoatchilikning e'tiboriga tushgandan keyin qoldirilganini ma'lum qilgan.