Test jarayonlarida qatnashadigan kuzatuvchilarning o‘ziga kuzatuvchi kerak emasmi?

23 fevral kuni O‘zbekiston Respublikasi prezidenti Administratsiyasi huzuridagi Axborot va ommaviy kommunikatsiyalar agentligida «Oliy ta'lim muassasalariga test sinovlari orqali qabul qilish tizimini takomillashtirish bo‘yicha qo‘shimcha chora-tadbirlar to‘g‘risida»gi qaror loyihasi bo‘yicha Davlat test markazi va ommaviy axborot vositalari vakillari o‘rtasida matbuot anjumani bo‘lib o‘tdi.

Ma'lumot uchun, 2018 – 2019 yilgi o‘quv yili qabulida turli hududlarda abituriyentlarga chetdan yordam bo‘lishi kabi holatlar takrorlangan.

Imtihondan so‘ng ham abituriyentlarni ma'lum mablag‘ evaziga o‘qishga kiritgan dekan va o‘qituvchilarga nisbatan jinoyat ishi qo‘zg‘atilgandi.

Kun.uz muxbiri Davlat test markazi direktori Majid Karimovga kirish imtihonlari jarayonida kuzatuvchi sifatida saralangan shaxslarning tanlab olinishi to‘g‘risida savol bilan yuzlandi.

DTM direktori esa shunday javob berdi:

«Har yil, masalan, bizga 5 ming kuzatuvchi kerak bo‘lsa, biz 10 mingdan ortiq mutaxassis orasidan ularni saralab olamiz. Ularning malakasini oshirish ishlari o‘tkazilgach, test sinovlarida sinab ko‘ramiz. Saralanganlarning qaysi kun, qayerga borishini bir kun oldin generatsiya qilamiz va ertalab ularni xabardor etamiz.

Biror obektda hali DTM vakili bino rahbari bo‘lmagan. Boshqa tashkilotlardan jalb qilingan odamlar bo‘lgan. Endi faqat bizning xodim nazorat qiladi. Har bir nazoratchining harakati tahlil qilinadi. Ular mas'uliyatni his qilib turadi.

Jamoatchilik nazoratiga ham katta e'tibor qaratilmoqda. Deputatlarimiz qattiq talab qilishmoqda, fikrlar bildirishmoqda. Jarayonga Adliya vazirligidan katta kuch tashlandi.

Xavfsizlik idoralaridan ham vakillar ishtirok etishadi.

Nazoratchilar tanlash ishlarini Xalq ta'limi vazirligi hamda Oliy va o‘rta-maxsus ta'lim vazirligiga topshiramiz. Eng halol, eng prinsipial va fidoyi vakillarni ta'lim muassasalarining rahbari o‘z imzosi bilan tasdiqlab jo‘natadi».

Video: Mover (tas-ix)

Video: Youtube