Malayziya Islom ilmiy universiteti O‘zbekiston ta'lim muassasalari bilan hamkorlikni kengaytiradi

O‘zbekistonning Kuala-Lumpur shahridagi elchixonasi bergan ma'lumotga ko‘ra, 2019 yilning 4 mart kuni Malayziya Islom ilmiy universiteti (USIM) rahbariyati va professor-o‘qituvchilari bilan uchrashuv bo‘lib o‘tdi. 

1998 yilda asos solingan davlat oliy ta'lim muassasasi USIM’da 32 yo‘nalishda ta'lim beriladi. Bugungi kunda u yerda 15 ming atrofida talaba tahsil oladi.

TIV xabariga ko‘ra, uchrashuv chog‘ida USIM va mamlakatimiz ta'lim muassasalari o‘rtasidagi munosabatlarni rivojlantirish istiqbollari muhokama qilingan hamda bu kabi hamkorlikning samaradorligi alohida ta'kidlangan. So‘nggi yarim yil ichida USIM bilan Urganch davlat universiteti va Samarqand davlat arxitektura-qurilish instituti o‘rtasida tadqiqotlarni birgalikda o‘tkazish sohasida, mutaxassislarni tayyorlash va ularning malakasini oshirish, studentlarni almashish bo‘yicha hamkorlik to‘g‘risidagi sherikchilik bitimlari imzolandi. Malayziya universiteti O‘zbekiston Milliy universiteti va Buxoro davlat universiteti bilan ham hamkorlik aloqalarini o‘rnatgan.

Natijada joriy yil yanvar oyida O‘zbekiston Xalqaro islom akademiyasida va Urganch davlat universitetida Islom ilmiy universiteti yetakchi professorlarining islom huquqi va bankingi, turizm, menejment, AKT va boshqa yo‘nalishlar bo‘yicha leksiyalari tashkil etildi.

Oliy ta'lim muassasalari o‘rtasidagi hamkorlikni yanada chuqurlashtirish va «visiting professors» shaklidagi amaliyotni davom ettirish maqsadida universitetning injyeneriya va qurilish fakulteti dekanini Toshkent arxitektura-qurilish institutida mustahkam arxitektura mavzusida leksiyalar kursini o‘tkazishi uchun 2019 yil 27 martdan 11 aprelgacha O‘zbekistonga yuborish to‘g‘risida kelishuvga erishildi.