OChL guruh bosqichining 2-turidagi «Ar-Rayyan»-«Lokomotiv» uchrashuvi oldidan matbuot anjumanida mezbon jamoaning yangi bosh murabbiyi Jilson Soza va yarimhimoyachi Muhammad Alaaeldin ishtirok etdi. Bu haqda Tribuna.uz muxbiri Dohadan xabar beradi.
«Bilamiz, o‘yin qiyin bo‘ladi. «Lokomotiv»ning ba'zi o‘yinlarini ko‘rib chiqdim. Jamoada juda yaxshi futbolchilar jamlangan. Himoyadan hujumga tezkorlik bilan o‘ta oladi. Jamoa tezkor o‘yin ko‘rsatadi, yuqori pressing qo‘llaydi. Ularga qarshi qo‘limizdan kelgan barcha ishni qilamiz, chunki keyingi bosqichga chiqishni istaymiz.
Jamoa o‘tish davrida turibdi. Ertangi o‘yin uchun asosiy rejam – jamoani kelajak uchun tayyorlash. Futbolchilar bir-birlarini yaxshiroq tushunib o‘ynay boshlashlariga erishmoqchiman. Ertaga maydonda nima qilishimiz kerakligini bilamiz.
Men bu klubda uzoq yildan ishlab kelyapman. Jamoa menga begona emas. Bu borada muammo yo‘q, barchamiz do‘stlarmiz. Vaziyatni o‘zgartirish uchun mehnat qilamiz», – dedi Soza.
Ma'lumot uchun, braziliyalik mutaxassis shu hafta boshida, ketma-ket uchta yirik hisobdagi mag‘lubiyatdan keyin iste'foga chiqarilgan Bulent Uyg‘unning o‘rniga mavsum yakuniga qadar bosh murabbiy etib tayinlangan. U bunga qadar futbolchi sifatida ham «Ar-Rayyan» sharafini himoya qilgan. Soza bosh murabbiy bo‘lishidan oldin klubning 23 yoshgacha futbolchilardan iborat jamoasiga ustozlik qilib kelayotgandi.
Matbuot anjumanida Sozaga hamrohlik qilgan 25 yoshli yarimhimoyachi Muhammad Alaaeldin avvalgi turda «Al-Ittihod»dan qabul qilingan 1:5 hisobidagi mag‘lubiyatni unutish muhimligi haqida gapirib o‘tdi.
«O‘yin qiyin bo‘lishiga shak-shubha yo‘q. Birinchi turda «Al-Ittihod»ga yutqazdik, vaholanki yaxshiroq o‘ynab, durang qayd etishimiz ham mumkin edi. Endi ertangi o‘yinda yengilishga haqqimiz yo‘q. Adashmasam, «Lokomotiv» bilan ilk marta o‘ynayapmiz, bu jamoa bilan to‘qnashuvlarni ijobiy boshlay olishimizga umid qilaman.
Butun jamoa yig‘ilib, gaplashib oldik – o‘tgan o‘yinni unutishimiz kerak. E'tiborimizni oldindagi o‘yinga qaratganmiz. Oldinda bizni ko‘plab bahslar kutib turibdi», – dedi Muhammad Alaeldin.
Eslatib o‘tamiz, «Ar-Rayyan»-«Lokomotiv» uchrashuvi 11 mart, dushanba kuni Dohadagi «Jassim bin Hamad» stadionida mahalliy vaqt bilan soat 18:35da (Toshkentda 20:35) start oladi. Unda mezbonlar qizil, mehmonlar oq rangli libosda maydonga tushadi. Uchrashuv bosh hakami – yaponiyalik Hiroyuki Kimura.
