Internetda bir necha shaxs shahardagi ko‘ngilochar maskanlardan birida mushtlashuv keltirib chiqargani tasvirlangan video tarqaldi.
Shu bilan birga, xabar qilinishicha, hodisa 3 mart kuni Sergeli tumanidagi «Utopiya» tungi klubida soat 2:00lar atrofida sodir bo‘lgan. Bu mushtlashuvda o‘nlab yigitlar ishtirok etgan.
Toshkent shahar IIBB xabarida aytilishicha, ichki ishlar organlariga 3 mart kuni ham, undan keyingi kunlarda ham na bu tumanda, na shaharning boshqa tumanlaridagi ko‘ngilochar maskanlarda tartibsizliklar yuz bergani haqida hech qanday ma'lumot kelib tushmagan. Videoda tasvirlangan mushtlashuv oqibatida jabrlangan shaxslar haqida ham xabar yo‘q.
Biroq, IIBB xabariga ko‘ra, ushbu videoyozuv qayerda va qachon tasvirga tushirilganini aniqlashtirish hamda tafsilotlarni bilish maqsadida tekshiruv boshlangan.
