Normativ-huquqiy hujjatlar loyihalari muhokamasi portalida Vazirlar Mahkamasining “Yer uchastkalarini fermer xo‘jaliklariga uzoq muddatli ijaraga berish tartibi to‘g‘risidagi nizomga qo‘shimcha va o‘zgartirishlar kiritish haqida”gi hujjat loyihasi joylashtirildi.

Yer uchastkalarini fermer xo‘jaliklariga uzoq muddatli ijaraga berish tartibi to‘g‘risidagi nizomga quyidagi qo‘shimcha va o‘zgartirishlar kiritilishi mumkin: 
 
5-bandning (Fermer xo‘jaligiga beriladigan yer uchastkalarining eng kam o‘lchami har bir shartli bosh chorva moliga hisoblanganda) uchinchi va to‘rtinchi xatboshilari quyidagi tahrirda bayon etiladi:

“Andijon, Namangan, Samarqand, Toshkent, Farg‘ona va Xorazm viloyatlaridagi sug‘oriladigan yerlarda – kamida 0,30 gektarni (nasldor chorvachilik fermer xo‘jaliklari uchun 0,5 gektarni);

Qoraqalpog‘iston Respublikasi, Buxoro, Qashqadaryo, Jizzax, Navoiy, Surxondaryo va Sirdaryo viloyatlaridagi sug‘oriladigan yerlarda – kamida
0,45 gektarni (nasldor chorvachilik fermer xo‘jaliklari uchun 0,6 gektarni);”.

7-bandning ikkinchi xatboshisi quyidagi tahrirda bayon etiladi:

“Fermer xo‘jaligi yuritish uchun yer uchastkasini olishda fermer xo‘jaligi tashkil etilayotgan joyda yashovchi shaxslar, shuningdek, yer maydonidan samarali foydalanib, yuqori hosildorlikka erishib kelayotgan, ko‘p tarmoqli fermer xo‘jaliklari, yerlarning meliorativ holatini yildan yilga yaxshilab kelayotgan, suv tejovchi texnologiyalarni joriy qilayotgan va kelgusida joriy qilish vazifalarini o‘z zimmasiga oladigan talabgorlar, tuman fermer, dehqon xo‘jaliklari va tomorqa yer egalari kengashi hamda O‘zbekiston yoshlar ittifoqi tuman (shahar) kengashining birgalikda berilgan tavsiyasiga ega bo‘lgan yosh fuqarolar boshqa teng sharoitlarda ustuvor huquqdan foydalanadilar.”.

7-1-bandda:

a) quyidagi mazmundagi ikkinchi xatboshi bilan to‘ldiriladi:

“yer maydonidan samarali foydalanib, yuqori hosildorlikka erishib kelayotgan, ko‘p tarmoqli faoliyatni yo‘lga qo‘ygan;”;

b) ikkinchi va beshinchi xatboshilar tegishli ravishda uchinchi va oltinchi xatboshilar deb hisoblanadi.