BAAning Emaar kompaniyasi O‘zbekistonda qurilish sohasida yangi loyihalarni amalga oshiradi

Birlashgan Arab Amirliklarining qurilish ishlari bilan ham shug‘ullanadigan Emaar Properties kompaniyasi O‘zbekistonda yangi loyihalarni amalga oshiradi. O‘zMTRKning «O‘zbekiston 24» telekanalida prezidentning BAAga tashrifiga bag‘ishlab tayyorlangan maxsus ko‘rsatuvida shu haqda ma'lum qilindi.

«Turizmni rivojlantirish masalasiga to‘xtaladigan bo‘lsak, biz amirliklarning eng yirik Emaar qurilish-developer kompaniyasi bilan ham kelishuvga erishdik. Ushbu kompaniya ko‘plab yirik inshootlarni qurgan, shu jumladan «Burj Xalifa»ni ham.

Yaqin vaqt ichida mazkur kompaniya vakillari mehmonxona infratuzilmalarini rivojlantirish loyihalarini ishlab chiqish uchun O‘zbekistonga keladi», degan bosh vazir o‘rinbosari Elyor G‘aniyev.

Emaar kompaniyasi direktorlar kengashi raisi, kompaniya direktori Muhammad Alabbar ham O‘zbekiston tomoni bilan kelishuvlar haqida gapirib o‘tgan.

«Tadbirkor sifatida biz doimo ishbilarmonlar uchun yaratilgan har tomonlama qulay va jozibador sharoitlarga intilamiz. Shuning uchun O‘zbekistondagi hozirgi imkoniyatlar bizni o‘ziga jalb etyapti.

Mening asosiy biznesim turli qurilish loyihalari, yirik mavzelar, zamonaviy mehmonxonalar va markazlar barpo etishga qaratilgan. Bundan tashqari, biz oziq-ovqat xavfsizligini ta'minlash bilan ham shug‘ullanamiz. 

So‘nggi ikki yil mobaynida O‘zbekistondagi ulkan o‘zgarishlar bizda katta qiziqishlar uyg‘otmoqda. Prezident boshchiligida keng ko‘lamli islohotlar izchil olib borilmoqda. Biz qo‘shma loyihalarimizdan aniq natijalar kutmoqdamiz.

O‘zbekistondagi kompaniyamning o‘ziga xos belgisi bo‘ladigan loyihani amalga oshirishga intilaman. Men turli sohalardagi loyihalar, turar joy mavzelari va mehmonxonalar qurishda zamonaviy O‘zbekiston rivoji uchun talab qilinadigan har qanday infratuzilmani ro‘yobga chiqarishga tayyorman», degan u.

Eslatib o‘tamiz, Shavkat Mirziyoyevning BAAga rasmiy tashrifi davomida umumiy qiymati 10 milliard dollardan ortiq bo‘lgan 12ta shartnoma imzolandi.