DW xabariga koʻra, Flydubai rasmiy vakili 1-oktabrga oʻtar kechasi parvozlar vaqtincha toʻxtatilganini maʼlum qilgan.
«Vaqtinchalik toʻxtatish tegishli idoralarga oʻz ishini davom ettirish va hodisaning barcha tafsilotlarini aniqlash imkonini beradi», - degan aviakompaniya vakili.
Uning taʼkidlashicha, Flydubai Birlashgan Arab Amirliklari hukumati va boshqa manfaatdor tomonlar bilan yaqin hamkorlikda ish olib bormoqda. Parvozlarni qayta tiklash haqidagi qaror qoʻshimcha maʼlumotlar kelib tushishiga qarab qabul qilinadi.
Hodisadan keyin Isroil transport vaziri Miri Regev Flydubaiʼning mamlakatga barcha reyslarini bekor qilishni talab qilgan. Shuningdek, u Fuqaro aviatsiyasi boshqarmasini BAA Isroil bilan tuzilgan aviatsiya kelishuvini buzgan-buzmaganini tekshirishga chaqirgan.
Maqolada qayd etilishicha, mazkur kelishuvga koʻra, Isroilga qoʻnadigan samolyotlarni faqat ushbu davlat bilan diplomatik munosabatlarga ega mamlakatlar pasportini olgan uchuvchilar boshqarishi mumkin. Hujum qilganlikda gumon qilinayotgan uchuvchi esa, OAV maʼlumotlariga koʻra, Ummon fuqarosi. Ummon va Isroil oʻrtasida diplomatik munosabatlar yoʻq.
Samolyotda nima sodir boʻlgan?
Dubaydan Tel-Avivga FZ1073 reysini amalga oshirayotgan Boeing 737 MAX 8 samolyoti bortni egallab olishga urinish haqida signal berilganidan soʻng, mahalliy vaqt bilan taxminan soat 09:00 da Saudiya Arabistonining Tabuk shahri aeroportiga favqulodda qoʻngan.
Dastlabki maʼlumotlarga koʻra, hodisaga uchuvchilar kabinasidagi janjal sabab boʻlgan. Asosiy taxminlardan biriga koʻra, ikkinchi uchuvchi havo kemasi komandiriga pichoq bilan hujum qilib, samolyot boshqaruvini qoʻlga olishga uringan.
Olishuv paytida samolyot Saudiya Arabistoni hududi uzra atigi 29 soniya ichida 9 410 metr balandlikdan 5 105 metrgacha keskin pasaygan.
Bortda 174 kishi, jumladan, 27 nafar bola boʻlgan. Ularning aksariyati Isroil fuqarolari ekani xabar qilingan.
Ayrim yoʻlovchilarning aytishicha, dastlab uchuvchilar kabinasidan baqiriqlar eshitilgan. Keyin kabina eshigi ochilib, uchuvchilardan biri yaralangani va kiyimlari qonga belangani koʻringan.
