«Yuventus» hujumchisi Krishtianu Ronaldu rahbariyat bilan klubning yozgi transfer rejalarini muhokama qildi, deb xabar tarqatdi Corriere dello Sport.
Manbaga ko‘ra, muhokama davomida portugaliyalik hujumchi qaysi futbolchilar keyingi mavsumda jamoani kuchaytirishga va Chempionlar ligasida muvaffaqiyat qozonishda yordam berishga qodir deb hisoblashini aytib, kamida 6 nafar futbolchining nomini sanab o‘tgan.
Ronaldu keltirgan ro‘yxatda birinchi bo‘lib uning hamyurti – «Benfika» hujumchisi Joau Felish qayd etilgan. Shuningdek, Krishtianu «Real»dagi sobiq jamoadoshlaridan Rafael Varan va Isko variantlarini taklif etgan. Qolaversa, u «Roma»dan himoyachi Kostas Manolas, «Fiorentina»dan hujumchi Federiko Keza va «Lion»dan yarimhimoyachi Tanguy Ndombeleni transfer qilishni maslahat bergan.
Qayd etilishicha, Ronaldu rahbariyat vakillari bilan uchrashuvdan oldin ushbu nomzodlar borasida bosh murabbiy Massimiliano Allegri bilan ham maslahatlashgan.
Eslatib o‘tamiz, avvalroq 33 yoshli hujumchi 19 yoshli Joau Felishni o‘z «vorisi» sifatida ko‘rayotgani xabar qilingan edi.
