O‘zbekistonda davlat-xususiy sherikligi masalalari qonun bilan tartibga solinadi

Senatning 19-yalpi majlisida «Davlat-xususiy sheriklik to‘g‘risida»gi Qonun ma'qullandi.

2018 yil 20 oktyabrdagi «Davlat-xususiy sheriklikni rivojlantirishning huquqiy va institutsional bazasini yaratish bo‘yicha birinchi navbatdagi chora-tadbirlar to‘g‘risida»gi Prezident Qaroriga asosan Moliya vazirligi huzurida Davlat-xususiy sheriklikni rivojlantirish agentligi tashkil etildi.

Mazkur agentlik amalga oshiruvchi sohaning asosiy yo‘nalishlarini belgilash maqsadida «Davlat-xususiy sheriklik to‘g‘risida»gi Qonun ishlab chiqildi.

Qonunda ko‘rsatilishicha, davlat-xususiy sherikligi davlat sherigi va xususiy sherikning muayyan muddatga yuridik jihatdan rasmiylashtirilgan, davlat-xususiy sheriklik loyihasini amalga oshirish uchun o‘z resurslarini birlashtirishiga asoslangan hamkorlik hisoblanadi.

44ta moddadan iborat bo‘lgan «Davlat-xususiy sheriklik to‘g‘risida»gi Qonunda quyidagilar belgilangan:

—  davlat sherigi va xususiy sherik qonun oldida teng;

—  xususiy sherikni tanlashdagi bahslashuv va xolislik prinsipi bo‘lishi lozim;

—  korrupsiyaga yo‘l qo‘ymaslik;

—  O‘zbekiston Respublikasi Vazirlar Mahkamasi davlat-xususiy sheriklik sohasidagi vakolatli davlat organidir.

Qonunga asosan, Moliya vazirligi huzuridagi Davlat-xususiy sheriklikni rivojlantirish agentligi davlat-xususiy sheriklik sohasidagi vakolatli davlat organi sifatida belgilanib, agentlikka davlat-xususiy sheriklikligi bo‘yicha qator vakolatlar beriladi.

«Ushbu Qonunga ko‘ra, davlat-xususiy sheriklik to‘g‘risidagi bitimning amal qilish muddatlari (3-49 yil) belgilab qo‘yilgan bo‘lsa-da, taraflar va manfaatlaridan kelib chiqqan holda bitimning amal qilish davrini o‘zgartirish bo‘yicha kelishib olishlari mumkinligi katta qulaylik yaratadi. Bundan tashqari, xususiy sherikning davlat sherigidan loyiha bo‘yicha zarur ma'lumotlarni olishi, davlat sherigi aybi bilan zarar yetkazilgan hollarda uni qoplashni talab qilishi kabi huquqlarning berilishi ham xususiy sektor uchun bir qator imtiyozlar beradi», — deya senator Sh.Aripovaning so‘zlarini keltirmoqda Kun.uz muxbiri.