«Toshshahartransxizmat» tarkibiy tuzilmasida o‘zgarish yuz beradi

“Toshshahartransxizmat” AJ tasarrufidagi korxona va muassasalarda yuz bergan o‘zgarishlar, ularning ayrimlari boshqa tizimga biriktirilganligi sababli jamiyat tarkibiy tuzilmasini yangidan tashkil etish bo‘yicha yagona aksiyador qarori qabul qilindi. 

“Toshshahartransxizmat” AJ faoliyatini muvofiqlashtirish, poytaxt aholisiga ko‘rsatilayotgan transport xizmati ishini yanada yaxshilash, sifat jihatdan yangi bosqichga olib chiqish, qo‘shimcha xizmatlarni joriy etish, eng muhimi harakat xavfsizligini ta'minlash asosiy vazifaga aylandi. Buning uchun esa soha doirasida ko‘rsatilayotgan xizmatlar va harakat xavfsizligi bilan bog‘liq masalalarni bevosita amalga oshirish, nazorat tizimini innovatsion loyihalar asosida takomillashtirish lozim bo‘ladi. 

Ana shunday jihatlar inobatga olinib, jamiyat tasarrufida bo‘lgani holda mustaqil tarzda faoliyat yuritgan “Toshyo‘lovchitransxizmat” hamda “Toshtransdispetcherxizmat” unitar korxonalari jamiyat tarkibiga birlashtirilmoqda. 

Buning natijasida “Toshshahartransxizmat” AJ avtobus saroy va korxonalarning boshqaruv apparati bo‘lib qolmay, unitar va boshqa turdagi tuzilmalarning vazifasini to‘g‘ridan-to‘g‘ri o‘z zimmasiga oladi. Jumladan, jamiyat tarkibiga kiruvchi avtobus saroylari va korxonalarining jamoat transporti yo‘nalishlaridagi nazoratini, GPS loyihalarini hamda oylik yo‘l chiptalari va jyetonlar yetkazib berishni bevosita amalga oshiradi.