Davlat notarial idoralari nodavlat notarial idoralari etib qayta tashkil etiladi

Normativ-huquqiy hujjatlar loyihalari muhokamasi portalida “O‘zbekiston Respublikasida notariat tizimini tubdan isloh qilish chora-tadbirlari to‘g‘risida”gi prezident farmoni loyihasi joylashtirildi.

Qayd etilishicha, O‘zbekiston Respublikasi Adliya vazirligi tomonidan notariat sohasini tartibga solish maqsadida “Notarius” avtomatlashtirilgan axborot tizimi yaratilgan va unda quyidagi imkoniyatlar shakllangan:

• barcha notarial harakatlar tizim orqali onlayn tarzda monitoring qilinishi, noqonuniy faoliyatning tizim orqali to‘xtatilishi hamda fuqarolarning shaxsini zamonaviy tekshirish usullarining qo‘llanilishi;
• notarial harakatlarning elektron tizimda majburiy qayd etilishi va har bir hujjatga takrorlanmaydigan maxsus raqam berilishi, shu orqali suiiste'molchiliklarning oldi olinishi;
• bajarilgan notarial harakatlar yagona elektron bazada qayd qilinishi va shu bilan soxta notarial hujjatlarning rasmiylashtirilishini oldi olinishi va hujjatlar haqidagi ma'lumotlar tarixi saqlanishi;
• mamlakatning butun hududi bo‘ylab notarial xizmatlar ko‘rsatishning sifati va tezkorligi, xodimlar tomonidan o‘z funksional vazifalarini lozim darajada bajarilishi ustidan masofadan nazorat qilinishi;
• notarial harakatlar uchun to‘lovlarning avtomatik tarzda hisoblanishi va elektron to‘lovlarni o‘tkazish imkoniyatlari bilan birga ularni tasdiqlovchi xabarlarning yuborilish funksiyalari hamda idoralararo axborot almashish elektron tizimi yo‘lga qo‘yilgan.

O‘zbekiston Respublikasi Adliya vazirligi notarial faoliyat to‘g‘risidagi ma'lumotlarni yig‘ish, ularga ishlov berish jarayonlarini kompleks avtomatlashtirish hamda notarial harakatlarni amalga oshirishga aloqador davlat organlari bilan axborot hamkorligining barcha turlarini ta'minlash maqsadida “Notarius” avtomatlashtirilgan axborot tizimini texnik ta'minlash va yuritishga mas'ul hisoblanadi.

O‘zbekiston Respublikasi Adliya vazirligi, Moliya vazirligi hamda Iqtisodiyot va sanoat vazirligining 2020 yil 1 yanvardan davlat notarial idoralarini bosqichma-bosqich nodavlat notarial idoralari etib qayta tashkil etish haqidagi taklifi ma'qullanishi mumkin.

Belgilanishicha:

• davlat notarial idoralarini nodavlat notarial idoralari etib qayta tashkil etish adliya organlarida nodavlat notarial idoralarni ro‘yxatdan o‘tkazish, shuningdek faoliyat yuritayotgan notariuslarga ularning arizalariga asosan notarial faoliyat bilan shug‘ullanish huquqini beruvchi litsenziya berish orqali amalga oshiriladi;
• tegishli notarial okrugda qonun hujjatlariga muvofiq yetarli miqdordagi nodavlat notarial idoralari tashkil etilguniga qadar davlat notarial idoralari o‘z faoliyatini davom ettiradi;
• nodavlat notarial idoralari notijorat tashkiloti ko‘rinishidagi muassasa hisoblanadi;
• fuqarolarni notarius kasbiy majburiyatlarini buzishi natijasida yetkaziladigan zarardan muhofaza qilish maqsadida nodavlat notarial idoralar notariuslarining fuqarolik javobgarligi sug‘urtalanadi;
• nodavlat notarial idoralarini davlat ro‘yxatidan o‘tkazish adliya organlari tomonidan amalga oshiriladi.

Quyidagilar nodavlat notarial idoralari faoliyatini moliyalashtirish manbalari etib belgilanadi:

• notarial harakatlarni amalga oshirganligi uchun undiriladigan davlat boji summasining O‘zbekiston Respublikasi Vazirlar Mahkamasi tomonidan belgilangan miqdorida nodavlat notarial idoralarida qoladigan qismi;
• huquqiy va texnik tusdagi qo‘shimcha harakatlar amalga oshirilganlik, shuningdek notariatning faol modeli doirasida xizmatlar ko‘rsatilganlik uchun olinadigan to‘lovlar;
• qonun hujjatlari bilan taqiqlanmagan boshqa manbalar.