Shov-shuvlarga sabab bo‘lgan 45-uy madaniy meros sifatida tan olindi

Internet nashrlarda ko‘plab bahs va munozaralarga sabab bo‘lgan, Toshkent shahar, Mirobod tumani Amir Temur ko‘chasi, 45-uy manzilida joylashgan turar joy binosi madaniyat vazirining 2019 yil 28 iyundagi 400-sonli buyrug‘iga asosan moddiy madaniy meros obektlari davlat kadastriga mahalliy ahamiyatdagi arxitektura yodgorligi sifatida kiritildi.

Buyruqqa ko‘ra, O‘zbekiston Respublikasi madaniyat vaziri Madaniy meros departamenti Moddiy madaniy merosning ko‘chmas mulk obektlari davlat hisobini yuritish bo‘limiga belgilangan tartibda olimlar, ekspertlar va malakali mutaxassislarni jalb etgan holda, mazkur manzildagi obekt haqida ma'lumotlarga, ayniqsa, uning tarixiy-madaniy qiymati haqida qo‘shimcha ma'lumotlar to‘plash, chuqur tekshirish, ilmiy o‘rganish va boshqa zarur chora-tadbirlarni amalga oshirishni izchil davom ettirishga ko‘rsatma bergan.

Madaniyat vazirining buyrug‘i bilan moddiy madaniy meros obektlari davlat kadastriga kiritilgan obekt “Madaniy meros obektlarini muhofaza qilish va ulardan foydalanish to‘g‘risida”gi qonun bilan muhofaza etiladi. Madaniy meros obektlarini muhofaza qilish va ulardan foydalanish to‘g‘risidagi qonun hujjatlarining buzilishida aybdor shaxslar belgilangan tartibda javobgar bo‘ladilar.

Toshkent shahar hokimligiga Madaniy meros obektlarini muhofaza qilish va ulardan foydalanish ilmiy-ishlab chiqarish bosh boshqarmasi tomonidan 2019 yil 13 fevraldagi 01-01/137-sonli, Toshkent shahar, Mirobod tumani Amir Temur ko‘chasi, 45-uy manzilida joylashgan turar joy binosi tarixiy-madaniy qiymatga ega deb topilib, madaniy meros obektlari davlat kadastriga kiritilsa, mazkur obektni qasddan buzish jinoiy javobgarlik keltirib chiqarishi hamda uning atrofidagi shaharsozlik qurilish ishlari cheklanishi yuzasidan xat taqdim etilgan.