KXDR Janubiy Koreya bilan birlashish to‘g‘risidagi muzokaralarni davom ettirmasligini bildirdi

Pxenyan Seul bilan muzokaralarni davom ettirmaydi, AQSh va Janubiy Koreyaning hamkorlikdagi harbiy mashg‘ulotlari sababli bundan "ma'no yo‘q", deyiladi KXDRning tinch yo‘l bilan birlashish qo‘mitasi matbuot kotibi bayonotida.

"Hozirda tarixiy Pxanmunjom deklaratsiyasini amalga oshirish boshi berk ko‘chaga kirib qoldi va Shimol-Janub muloqoti uchun imkoniyat yo‘qqa chiqdi. Bu Janubiy Koreya rahbarining o‘zboshimcha harakatlari natijasidir", - deyiladi bayonotda.

"Janubiy Koreya hukumati KXDR-AQSh bo‘lajak muloqotlarining notinch suvlaridan o‘lja izlamoqda va hamkorlikdagi harbiy mashg‘ulotlardan so‘ng muloqot xuddi yil fasllari almashganidek yana davom etishini orzu qilmoqda. Ular bu bema'ni istaklaridan voz kechishiga to‘g‘ri keladi", - deya qayd etiladi bayonotda.

Unda shuningdek, Pxenyanning Janubiy Koreya hukumati bilan boshqa gaplashadigan gapi yo‘qligi va muzokaralar stoliga aslo o‘tirmasligi aytiladi.

Pxanmunjom deklaratsiyasi Pxanmunjom chegara punktida Koreyalararo sammit yakunida imzolangandi. Unda tomonlar Koreya yarimorolida dushmanlikni to‘xtatish va tinchlik shartnomasi tuzish majburiyatini olgan.