DW xabariga koʻra, Zelenskiy bu haqda 28-sentabr, dushanba kuni kechki murojaatida maʼlum qilgan. U Ukraina Mudofaa vazirligi Bosh razvedka boshqarmasi hisobotidagi «yangi maʼlumotlar»ga tayangan.
Ukraina prezidenti soʻzlariga koʻra, ayni paytda KXDR harbiylari tayyorgarlikdan oʻtish va keyinchalik Rossiyaga yuborish uchun saralanmoqda.
Zelenskiy Rossiya rasmiylari Ukrainaga qarshi urushda qatnashish uchun xorijliklarni yollash koʻlamini oshirishni rejalashtirayotganini ham aytgan.
«Rossiya oʻz armiyasiga odamlarni jalb qilayotgan mamlakatlar hukumatlari bunga qarshi chora koʻrishi muhim. Biz har bir hukumatni xabardor qilamiz», - degan u.
Janubiy Koreya razvedkasi baholashicha, Shimoliy Koreya Rossiyani urushda qoʻllab-quvvatlash uchun jami 15 mingga yaqin harbiy xizmatchini yuborgan. Pxenyan buning evaziga Moskvadan pul, harbiy texnologiyalar va xavfsizlik kafolatlarini olayotgani taxmin qilinmoqda.
Zelenskiy avgust oyida KXDR Rossiya hududiga 30 mingdan 50 ming nafargacha harbiy joylashtirish niyatida ekanini aytgan edi.
Bayonot Kiyev va Seul oʻrtasidagi bahs fonida yangradi
Zelenskiyning yangi bayonoti Ukraina va Janubiy Koreya oʻrtasida bir necha kun avval yuzaga kelgan kelishmovchilik fonida yangradi.
Janubiy Koreya prezidenti Li Chje Myon Zelenskiyni maxfiylik haqidagi kelishuvni buzganlikda ayblab, Ukraina rasmiylarini keskin tanqid qilgan. Bunga Zelenskiyning Kursk viloyatidagi janglarda Ukraina Qurolli kuchlari tomonidan asir olingan ikki nafar shimoliy koreyalik askarning Seulga topshirilgani haqida ochiq maʼlum qilgani sabab boʻlgan.
Zelenskiy ofisi esa ikki mamlakat oʻrtasida ushbu maʼlumotni oshkor qilmaslik boʻyicha kelishuv boʻlmaganini bildirgan. Seul bu javobni yolgʻon deb atagan.
Yonhap agentligi xabariga koʻra, 28-sentabr kuni Janubiy Koreya Tashqi ishlar vazirligi Ukraina elchisi vazifasini bajaruvchini chaqirtirgan. Vazir oʻrinbosari ukrainalik diplomatga ushbu masala yuzasidan Seulning qatʼiy pozitsiyasini yetkazgan.
