Prezidentning davlat xavfsizlik xizmati vakolatlariga doir yangi qonun Senatda ma'qullandi

Senat yalpi majlisida “Xavfsizlik va mudofaa sohasidagi qonun hujjatlari takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi ma'qullandi.

Mazkur qonun bilan, O‘zbekiston Prezidenti davlat xavfsizlik xizmatining vakolatlari, xususan huquqbuzarliklar profilaktikasi, terrorizmga qarshi kurashish va boshqa sohalardagi huquqlari belgilab berilmoqda.

Kun.uz muxbirining xabar berishicha, loyiha 80ta ovoz bilan qabul qilingan. Hujjat prezident imzolab, rasman e'lon qilinganidan so‘ng kuchga kiradi.

Qonunda O‘zbekiston Respublikasi Prezidenti davlat xavfsizlik xizmatini tashkil etish va uning faoliyatini tartibga solish bilan bog‘liq huquqiy normalardan kelib chiqib, bir qator qonunlarga o‘zgartish va qo‘shimchalar kiritish nazarda tutilgan.

Jumladan, “Huquqbuzarliklar profilaktikasi to‘g‘risida”gi qonun O‘zbekiston Respublikasi Prezidenti davlat xavfsizlik xizmati organlarining huquqbuzarliklar profilaktikasi sohasidagi vakolatlarini belgilovchi yangi modda bilan to‘ldirilmoqda.

Ushbu moddaga binoan, O‘zbekiston Respublikasi Prezidenti davlat xavfsizlik xizmati organlari:

– huquqbuzarliklar profilaktikasiga doir davlat dasturlarini ishlab chiqish va amalga oshirishda ishtirok etadi;
– huquqbuzarliklar profilaktikasini amalga oshiradi, shu jumladan huquqbuzarliklarning sodir etilishi sabablarini va ularga imkon berayotgan shart-sharoitlarni aniqlaydi, bartaraf etadi;
– qo‘riqlanuvchi shaxslarning manfaatlari, xavfsizligi va daxlsizligiga qarshi huquqbuzarliklar sodir etishga moyil bo‘lgan shaxslarning hisobini yuritadi;
– huquqbuzarliklar profilaktikasini bevosita amalga oshiruvchi va unda ishtirok etuvchi boshqa organlar hamda muassasalar bilan hamkorlik qiladi;
– hamda qonun hujjatlariga muvofiq boshqa vakolatlarni amalga oshiradi.

Shu kabi, “Terrorizmga qarshi kurash to‘g‘risida”gi qonun ham Prezident davlat xavfsizlik xizmatining terrorizmga qarshi kurash sohasidagi vakolatlarini belgilovchi yangi modda bilan to‘ldirilmoqda.

Bundan tashqari, qonunda ayrim qonunlarning matnlariga tahririy o‘zgartish va qo‘shimchalar, jumladan Prezident davlat xavfsizlik xizmatini vazirlik va idoralar ro‘yxatlariga kiritish ko‘zda tutilgan.

Masalan, Davlat bayrog‘i, gerbi, mukofotlari, ish bilan ta'minlash, nafaqa hamda sog‘liqni saqlash sohasidagi munosabatlarni tartibga soluvchi qonunlar shular jumlasidandir.

Umuman, yangi qonun bilan “O‘zbekiston Respublikasining Davlat bayrog‘i to‘g‘risida”gi, “Sudlar to‘g‘risida”gi, “Terrorizmga qarshi kurash to‘g‘risida”gi, “Tezkor-qidiruv faoliyati to‘g‘risida”gi, “Huquqbuzarliklar profilaktikasi to‘g‘risida”gi, Jinoyat-protsessual, Bojxona va Soliq kodekslari hamda boshqa qonunlarga O‘zbekiston Respublikasi Prezidenti davlat xavfsizlik xizmatiga taalluqli o‘zgartish va qo‘shimchalar kiritilmoqda.

Ma'lumot uchun, O‘zbekiston Respublikasi Prezidenti davlat xavfsizlik xizmati – prezidentning 2018 yil 24 yanvardagi Farmoni asosida tashkil etilgan.

Davlat rahbarining 2018 yil 21 fevraldagi Qarori bilan “O‘zbekiston Respublikasi Prezidenti davlat xavfsizlik xizmati to‘g‘risida”gi Nizom ham tasdiqlangan.