«Jizzax ta'lim imijini yaratamiz» - Jizzax viloyati xalq ta'limi boshqarmasi

Jizzax viloyati xalq ta'limi boshqarmasi rahbari Dilfuza Sadriddinova viloyatda bugungi kunda xalq ta'limi tizimidagi yangiliklar, muammo va kamchiliklar, ularni bartaraf etish borasida olib borilayotgan ishlar xususida o‘z fikrlarini bildirdi.

Jizzax viloyati xalq ta'limi boshqarmasiga rahbar etib saylanganimga ko‘p bo‘lgani yo‘q. Viloyatimiz ta'lim tizimini rivojlantirish borasida bugungi kunda qisqa vaqtda bo‘lsa-da, bir qator loyihalar amalga oshirishga erishdik deb o‘ylayman. Jumladan, umumiy o‘rta ta'lim maktablarida ta'lim sifatini oshirish, ularni rivojlantirish, maktabda ma'naviy sog‘lom muhitni yaxshilash maqsadida “Ustoz-shogird” tamoyilida “Progress” rivojlantirish klubi loyihasi ishlab chiqildi va amaliyotga joriy etildi. Viloyatimizda mavjud 542 ta maktab tumanlar kesimida 3 toifada tahlil etildi, ya'ni “Yuqori rivojlangan” maktablar, “O‘rtacha rivojlangan” maktablar va “Past rentabilli” maktablar. 542 ta maktabdan 144 tasi ilg‘or, 270 tasi o‘rtacha faoliyat ko‘rsatadi va 131 ta maktab yordamga muhtoj, ushbular aniqlangach, klubning Nizomi ishlab chiqilib, ilg‘or-yuqori ko‘rsatgichlarda faoliyat ko‘rsatayotgan maktablarga past natijalarda harakatlanayotgan maktablar rahbarlarini biriktirish, ushbu maktabda ustoz-shogird tamoyilida aniq o‘rganishi va o‘rgatishi lozim bo‘lgan vazifalar belgilandi va amaliyotga yo‘naltirildi.

Viloyat xalq ta'limi tizimida muammolardan yana biri ariza va shikoyatlarning keskin ko‘paygani, aksariyat ariza va shikoyatlar maktab rahbarlarining nojo‘ya xatti-harakatlari, ota-onalar va pedagoglarning o‘rtasidagi munosabatning buzilganligi natijasida yuzaga kelganligi aniqlandi. Bularni bartaraf etish borasida, “Jizzax-ta'lim, adolat va ishonch” telegram boti ochilib, unga viloyatdagi barcha ota-onalar va o‘qituvchi pedagoglarni a'zo qilish va targ‘ibot ishlari boshlandi. Botga murojaatlar joylarda o‘rganilib, ijobiy natijalarga erishilmoqda. Natijada, 2 oylik tahlillarga ko‘ra, jismoniy shaxslarning murojaatlari joriy yil iyul oyida jami 66 ta turli ko‘rinishda qayd etilgan bo‘lsa, avgust oyida bu murojaatlar 32 tani tashkil etdi.

Bugungi kunda  Jizzax viloyati xalq ta'limi boshqarmasining o‘zida “Progress” rivojlantirish laboratoriya Markazi tashkil etildi. Unga alohida xona ajratilib, 20 dona zamonaviy kompyuter texnikalari bilan jihozlandi. Markaz onlayin kuzatuv va masofaviy o‘qitishga mo‘ljallangan bo‘lib, uning maqsad va vazifalari rahbar kadrlar faoliyatini prognozlashtirish, malakasini oshirish, zaxira kadrlar bankini yaratishdan iborat. Bugungi kunda 542 ta umumiy o‘rta ta'lim maktab direktorlari laboratoriyadan o‘tkazilib, aniqlangan bo‘shliqlar yuzasidan shu markazning o‘zida o‘quvlar  tashkil etildi. Bu laboratoriya markazi tizimli ravishda ishlashi ta'minlanadi. Markaz ishi rahbar va pedagog hodimlarning bugungi kunda ta'lim tizimida amalga oshirilayotgan islohotlarni amalda joriy etish yo‘llari, ta'lim muassasalardagi mavjud muammolarni bartaraf etish ko‘nikmalarini shakllantirish, eng avvalo ta'lim sifati va samaradorligini oshirishga qaratilgandir. Markazga tajribali, hozirgi kunda nafaqadagi faxriy ustozimiz Saidahmad Mirzabekov rahbarlik qilmoqda. Shuningdek, joriy yilning sentabr oyidan boshlab, ushbu markaz qoshida chekka hududlarda faoliyat ko‘rsatayotgan pedagoglarga metodik xizmat ko‘rsatish tizimi joriy etilishi rejalashtirilgan

Ayni kunlarda o‘quvchilarning  iqtidorini aniqlash va uni yuksaklashtirish, ilmiy- amaliy yondashuv bilan bolalarni bilimga qiziqtirish masalalariga e'tibor qaratilyapti. Xalq ta'limi boshqarmasi qoshida “Intellektual kelajak” bolalar akademiyasi tashkil etilmoqda. Shu kunlarda Germaniyadagi eng nufuzli gimnaziyalari bilan hamkorlik qilish borasida muzokaralar olib boryapmiz,  eng tajribali o‘qituvchilarning aynan viloyatimizga ishlashga taklif etish niyatidamiz. Bugun biz Innovatsion ta'limga kirish uchun sog‘lom raqobatni kuchaytirishimiz kerak, bu boradagi rejalarimizni bosqichma-bosqich amalga oshiramiz. 

Barcha maktablarda bo‘lgani kabi viloyatdagi umumta'lim o‘quv dargohlarida ham “Bilimlar kuni” ni nishonlandi, “Mustaqillik dars” lari bo‘lib o‘tdi. Bu darslarni viloyat hokimligidan tortib barcha tashkilot rahbarlari o‘tib berishdi. Maktab pedagogik jamoalari, o‘quvchilar va ularning ota-onalari bilan tashkil etilgan uchrashuvlar va dars soatlari mamlaktimizning ertasi bo‘lgan o‘quvchi yoshlar ko‘nglida ezgu orzu umidlar uyg‘otishi shubhasiz.

Respublika rahbarining 23 avgust kungi videoselektorida quyidagilar ta'kidlandi, ya'ni maktabni o‘zgartirmasdan turib, odamni, jamiyatni o‘zgartirib bo‘lmaydi. Ta'lim tarbiyaning asosi, poydevori bu — maktab. Maktabni maktab qiladigan kuch esa o‘qituvchilardir. “Maktab bu hayot-mamot masalasi, kelajak masalasi” biz shu maktabda shunday kelajakni tarbiya qilaylikki, toki ular intellektual bilimli, ijodiy va tanqidiy fikrlovchi, qat'iy pozitsiyaga ega bo‘lish bilan bir qatorda, madaniyatli, ma'rifatli, ongu shuuri ilm bilan yo‘g‘rilgan, vatanparvarlikni yurakdan his eta oladigan, kamtar, samimiy, sadoqatli va adolatli bo‘lsin.

Jizzax viloyat Xalq ta'limi boshqarmasi