Germaniya ishbilarmon doiralari vakillari Andijonga tashrif buyuradi

O‘zbekistonning Germaniyadagi elchixonasi matbuot xizmatining ma'lum qilishicha, delegatsiya tarkibi qishloq xo‘jaligi texnikasi, avtomobilsozlik, oziq-ovqat va to‘qimachilik sanoati, qurilish materiallari ishlab chiqarish, qishloq xo‘jalik mahsulotlarini qayta ishlash, bank va konsalting xizmatlari sohalarida ish olib borayotgan 20 dan ortiq nemis kompaniyalari vakillaridan iborat.

Delegatsiya a'zolari orasida «Commerzbank» va «Landesbank Baden-Württemberg», «Trützschler GmbH & Co. KG», «Max Holder GmbH», «ABM Anlagenbau und Maschinentechnik GmbH», «Gühring GmbH», «SR Business Germany», «ITM Investment Trade Marketing GmbH», «Rödl&Partner» i «RSP-i» kabi yetakchi banklar va kompaniyalar vakillari bor. 

Germaniyalik ishbilarmonlarning bo‘lajak tadbirda ishtirok etishdan maqsadi Andijon viloyatining investitsiya va eksport salohiyati bilan bevosita tanishish, shuningdek, mahalliy tadbirkorlar bilan to‘g‘ridan-to‘g‘ri aloqalarni o‘rnatishdir.

Biznes-forum doirasida Germaniya ishbilarmon doiralari vakillari o‘zbekistonlik sheriklari bilan G2B va B2B formatlarida ikki tomonlama uchrashuvlar o‘tkazishi rejalashtirilgan bo‘lib, yakunda aniq investitsiya loyihalari va eksport shartnomalari bo‘yicha kelishuvlarga erishish kutilmoqda.

Hozirgi vaqtda Andijon viloyatida Germaniya sarmoyasi ishtirokida umumiy qiymati 200 million yevrodan ortiq qo‘shma loyihalar amalga oshirilmoqda.

Xususan, Germaniya kompaniyalari Qo‘rg‘ontepa tumanida trikotaj fabrikasini modernizatsiya qilish va tozalangan o‘simlik moyi ishlab chiqarish zavodini qurish, Xo‘jaobod tumanida transport-logistika markazini barpo etish, Shahrixon tumanida quritilgan mevalar va ziravorlar ishlab chiqarish loyihalarida ishtirok etmoqda.