Britaniyada migrantlarning o‘limi bo‘yicha ish doirasida Vetnamda sakkiz kishi qo‘lga olindi

O‘tgan haftada Xatin provinsiyasida noqonuniy migratsiya tashkil etishda gumonlanib ikki kishi ushlangandi.

Vetnam politsiyasi Britaniyada migrantlarning o‘limi bo‘yicha ish doirasida sakkiz kishini qo‘lga oldi. Bu haqda VnExpress nashri xabar bermoqda.

Noqonuniy migratsiya tashkilotiga aloqadorlikda gumonlangan sakkiz kishi 3 noyabr kuni Ngean provinsiyasida qo‘lga olingan. Xabar qilinishicha, apreldan avgustgacha ushbu provinsiyadan mamlakatni tark etgan 21 kishi Buyuk Britaniyada izsiz g‘oyib bo‘lgan.  

O‘tgan haftada Xatin provinsiyasida noqonuniy migratsiya tashkil etishda gumonlanib ikki kishi ushlangandi.

Eslatib o‘tamiz, Britaniya politsiyasi 23 oktabr kuni Angliya sharqidagi Esseks grafligining Greys shaharchasidagi sanoat zonasida turgan yuk mashinasi ichidan 31 erkak va 8 ayolning jasadini topgandi. 

BMT ma'lumotlariga ko‘ra, Vetnamdan Yevropaga noqonuniy olib borish bilan shug‘ullanuvchi kontrabandachilar bir yilda 300 million dollar atrofida pul ishlab olishadi.