DW xabariga koʻra, Britaniya Mudofaa vazirligi bu haqda 20-oktabr kuni maʼlum qilgan. Qaror Eronga ittifoqchi husiychilarning Saudiya Arabistoniga hujumlari kuchaygan bir paytda qabul qilingan.
Qiruvchilardan tashqari, Britaniya harbiy texnikani tashish uchun Airbus A400M transport samolyotini ham taqdim etadi. Mamlakatga britaniyalik harbiy maslahatchilar ham yuboriladi.
London husiychilarning fuqarolik obyektlariga, jumladan, Ar-Riyod aeroportiga zarbalarini qoralagan. Britaniya mudofaa vaziri Ues Striting bu hujumlarni mintaqadagi vaziyatni keskinlashtiruvchi harakatlar deb baholagan.
10-oktabr kuni Ar-Riyoddagi Qirol Xolid nomidagi xalqaro aeroportga raketa zarbasi berilishi oqibatida 13 kishi halok boʻlgan, yana 308 kishi jarohatlangan. Hujum uchun masʼuliyatni husiychilar oʻz zimmasiga olgan.
Guruh Saudiya Arabistoni havo hududini «harbiy operatsiyalar zonasi» deb eʼlon qilib, yoʻlovchi samolyotlarini undan foydalanmaslikka chaqirgan. Keyinchalik aeroport yana hujumlarga uchragan.
Husiychilar sentabr boshida Yaqin Sharqdagi harbiy harakatlarini kengaytirishini bildirib, Saudiya Arabistoni janubidagi toʻrt shaharga zarba bergan edi. Oʻsha hujumlarda 70 dan ortiq kishi jabrlangan, neft obyektlarida yongʻin chiqqan. Saudiya tomoni esa Yamanning husiychilar nazoratidagi viloyatlariga 60 dan ortiq havo zarbasi bergan.
Sentabrda husiychilar Qizil dengiz sohilidagi Moxa porti va Bob al-Mandab boʻgʻozidagi ayrim orollarni ham egallagan. Mazkur boʻgʻoz jahon savdosi va neft tashuvlari uchun muhim yoʻnalish hisoblanadi.
Guruh Bob al-Mandab orqali harakatlanish Saudiya kemalaridan tashqari barcha tijorat kemalari uchun xavfsiz ekanini daʼvo qilgan. 19-sentabrda esa Saudiya boshchiligidagi koalitsiya husiychilarning Ar-Riyodga yoʻnaltirilgan ballistik raketasi tutib qolinganini maʼlum qilgan edi.
