Mahalliy hokimliklarning o‘z budjetini qabul qilishi qonun bilan mustahkamlanadi

2019 yil 4 noyabr kuni Oliy Majlis Qonunchilik palatasidagi Budjet va iqtisodiy islohotlar qo‘mitasi hamda Davlat budjeti boshqarmasi tomonidan “2020 yil uchun O‘zbekiston Respublikasining Davlat budjeti to‘g‘risida”gi qonun loyihasi bo‘yicha seminar o‘tkazildi.

Ta'kidlanganidek, “2020 yil uchun O‘zbekiston Respublikasining Davlat budjeti to‘g‘risida”gi Qonunning qabul qilinishi davlat boshqaruvi sektorining barcha darajalarining budjet borasidagi mas'uliyatini oshiradi hamda budjet ijrosi intizomini yanada mustahkamlaydi.

Shuningdek, ushbu Qonun bilan Davlat budjeti daromadlarining soliq turlari bo‘yicha xarajatlarini sohalar kesimida O‘zbekiston Respublikasi Oliy Majlisi va xalq deputatlar mahalliy Kengashlari tomonidan qayta-qayta tasdiqlanishiga barham beriladi.

Bugungi kunga qadar mahalliy hokimliklar o‘z budjetini qabul qilishda respublikadan yetkazilgan raqamlar asosida tasdiqlab qo‘yar edi. Ular biror raqamni o‘zgartirish vakolatiga ega emas edi. Mahalliy Kengashlarda budjetni qabul qilish ramziy ma'noga ega edi.

Taklif etilayotgan qonun loyihasida mahalliy budjetlarning daromadlarini soliq turlari bo‘yicha hamda xarajatlarini budjet tashkilotlari kesimida o‘zlari belgilashi o‘z aksini topgan. Xalq deputatlari mahalliy Kengashlari o‘zlariga tegishli bo‘lgan budjetni qabul qilishdagi haqiqiy mustaqilligi ta'minlanadi.

Vazirlik va idoralarning budjetlari Oliy Majlis tomonidan tasdiqlanishi ularga ajratilgan budjet mablag‘larining natijadorligini ta'minlashga xizmat qiladi.

Davlat budjeti daromadlari qismida bo‘layotgan o‘zgarishlar, mahalliy hokimiyat tomonidan iqtisodiyotni rivojlantirish orqali soliqqa tortish bazasini kengaytirishga va budjetga tushadigan tushumlarning ko‘paytirishga bo‘lgan qiziqishlarini oshiradi. Qarz mablag‘larini jalb qilish bo‘yicha chegaralarning o‘rnatilishi ushbu mablag‘lardan foydalanish samaradorligini oshiradi hamda Davlat budjetining uzoq muddatli barqarorligini ta'minlash imkonini beradi.