Mudofaa vazirligi Axborot departamentining asosiy vazifalari belgilanadi

O‘zbekiston Respublikasi Mudofaa vazirligining axborot va ommaviy kommunikatsiyalar sohasidagi faoliyati yanada takomillashtiriladi. Tegishli hujjat loyihasi muhokama uchun e'lon qilindi.

Qayd etilishicha, quyidagilar:

O‘zbekiston Respublikasi Mudofaa vazirligi Matbuot xizmati, Qurolli Kuchlar Media markazi va “Vatanparvar” birlashgan tahririyati negizida Mudofaa vazirligi Axborot va ommaviy kommunikatsiyalar departamenti;
 
harbiy okrug qo‘mondonliklari va unga tenglashtirilgan birlashmalarda matbuot xizmatlari tashkil etilgan.

Belgilab qo‘yilishicha, Axborot departamenti O‘zbekiston Respublikasi Mudofaa vazirligi markaziy apparatining bosh boshqarmasi maqomiga tenglashtirilgan mustaqil tarkibiy bo‘linma hisoblanadi.

Quyidagilar Axborot departamentining asosiy vazifalari etib belgilanadi:

O‘zbekiston Respublikasi Mudofaa vazirligi faoliyati haqida ommaviy axborot vositalari, davlat va nodavlat televideniye kanallari va eshittirishlari, ijtimoiy tarmoqlar, Mudofaa vazirligi, harbiy okrug qo‘mondonliklari va birlashmalarning rasmiy veb-saytlari, “Vatanparvar” gazetasi, “O‘zbekiston armiyasi” jurnali, shuningdek, boshqa axborot resurslari orqali, shu jumladan, matbuot anjumanlari, brifinglar, davra suhbatlari, mediaturlar tashkil etish yo‘li bilan aholiga muntazam, to‘liq va tezkor ravishda axborot taqdim etib borish;

O‘zbekiston Respublikasi Mudofaa vazirligi, harbiy okrug qo‘mondonliklari va birlashmalarning rasmiy veb-saytlarida Mudofaa vazirligi tomonidan belgilangan tartibda ishlab chiqilayotgan normativ-huquqiy hujjatlarning loyihalarini va mudofaa sohasida qabul qilinayotgan normativ-huquqiy hujjatlarni joylashtirish, mudofaa va harbiy sohada amalga oshirilayotgan islohotlarning mazmun-mohiyatini keng jamoatchilikka yetkazish;

ijtimoiy so‘rovlar o‘tkazish va boshqa usullar yordamida jamoatchilik fikrini o‘rganish orqali O‘zbekiston Respublikasi Mudofaa vazirligining ijobiy imijini shakllantirish va ko‘tarish;

o‘zaro hamkorlikda ishlaydigan jurnalistlar va blogerlar orqali O‘zbekiston Respublikasi Mudofaa vazirligining faoliyatiga oid tezkor xabarlarni tarqatish, shuningdek ishlab chiqilayotgan normativ-huquqiy hujjatlar loyihalarining muhokamasida aholining keng qatlamlari qatnashishini ta'minlash;

ommaviy axborot vositalarida muntazam ravishda O‘zbekiston Respublikasi mudofaa vaziri va uning o‘rinbosarlari, harbiy okrug va birlashma qo‘mondonlarining chiqishlarini tashkil etib borish; 

ommaviy axborot vositalari, davlat va nodavlat teleradiokanallari orqali tarqatish uchun xabarlar, ma'lumotlar va boshqa shu kabi axborot-tahliliy materiallar tayyorlash; 

zimmasiga yuklatilgan vazifalarni amalga oshirishda O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi bilan samarali amaliy hamkorlikni yo‘lga qo‘yish;

Mudofaa vazirligi faoliyatiga aloqador matnli, foto, audio va videomateriallardan iborat ma'lumotlar bazasini shakllantirish va yangilab borish;

axborot makoni monitoringini olib borish va tahlil qilish, tanqidiy va keng muhokama qilinayotgan axborot xurujlariga tezkor munosabat bildirish, ommaviy axborot vositalari va internet tarmog‘ida O‘zbekiston Respublikasi Mudofaa vazirligi faoliyatiga doir axborotni tarqatish bo‘yicha ishlarni tashkil qilish.

Belgilab qo‘yilishicha, Axborot departamentini bir vaqtning o‘zida O‘zbekiston Respublikasi mudofaa vazirining matbuot kotibi hisoblanadigan, axborot siyosati masalalari bo‘yicha mudofaa vazirining maslahatchisi maqomiga ega bo‘lgan boshliq boshqaradi.

O‘zbekiston Respublikasi Mudofaa vazirligi sohaga oid axborot tarqatish borasida quyidagi eng muhim yo‘nalishlar bo‘yicha kompleks chora-tadbirlarni amalga oshiradi:

O‘zbekiston Respublikasi Mudofaa vazirligi faoliyatiga oid ochiq ma'lumotlardan jismoniy va yuridik shaxslarning foydalanishi uchun tegishli shart-sharoitlar yaratish;

O‘zbekiston Respublikasi Mudofaa vazirligining media tizimi va veb-resurslari, nashriyoti, televizion va studiya faoliyatini rivojlantirish;

O‘zbekiston Respublikasi Mudofaa vazirligi, harbiy okrug qo‘mondonliklari va birlashmalar matbuot xizmatlari faoliyatini takomillashtirish, ular xodimlarining salohiyati va kasbiy tayyorgarligi darajasini mustahkamlash;

Mudofaa vazirligi, harbiy okrug qo‘mondonliklari va birlashmalar matbuot xizmatlari faoliyatiga zamonaviy axborot-kommunikatsiya texnologiyalarni joriy etish, ularning moddiy-texnik bazasini takomillashtirish;

harbiy-vatanparvarlik va tahliliy yo‘nalishlarda turli yuqori darajadagi va sifatli teleko‘rsatuvlarni tayyorlash uchun telestudiya tashkil etish.

O‘zbekiston Respublikasi Oliy va o‘rta maxsus ta'lim vazirligi O‘zbekiston jurnalistika va ommaviy kommunikatsiyalar universiteti o‘quv bazasida Mudofaa vazirligining axborot xizmati va harbiy jurnalistika sohasi mutaxassislarining malakasini oshirish bo‘yicha har yili ikki bosqichli o‘quv kurslari tashkil etilishini ta'minlaydi.