Urushayotgan davlatda qahramonlar odatda harbiylar bo‘ladi, lekin Ukrainada hozir 35 yoshli dasturchi yigit hammadan mashhur. Sobiq mudofaa vaziri Mixaylo Fyodorov xalq orasida qo‘llov bo‘yicha Zelenskiy bilan bemalol raqobatlasha oladi. Uning iste’fosidan keyin boshlangan namoyishlar hamon to‘xtagani yo‘q. Xo‘sh, Fyodorov mudofaa vazirligi tizimida nima qilgandiki, odamlar uni bunchalik yaxshi ko‘rib qolishdi?
Dasturchilikdan mudofaa vazirligiga
Fyodorov yoshligidan davlat xizmatchisi bo‘lishga qaror qilgan, shu yo‘nalishda o‘qigan. Xususan, NATO vakillarining Ukrainadagi maktabida ta’lim olgan. Mutaxassisligi bo‘yicha dasturchi. O‘zining aytishicha, 9-sinf vaqtida unga kompyuter sovg‘a qilishlari hayotini o‘zgartirib yuborgan. Qiziquvchan yigit darsliklarni raqamlashtirishda o‘qituvchilariga yordam bergan, internet o‘yinlari orqali elektron pul ishlagan.
Universitetning uchinchi kursida o‘qib yurganida uni Zaporijjya talabalar meri degan lavozimga saylashadi. Bo‘lajak vazir o‘z faoliyatini ijtimoiy tarmoqlarda targ‘ib qiladi, shu tariqa targ‘ibot bo‘yicha professionalga aylanib boradi.
2015-yil o‘zining shaxsiy SMM kompaniyasini ochgan Fyorodovning mijozlaridan biri Zelenskiyning «Kvartal-95» studiyasi bo‘ladi. Yigit Ukrainaning birinchi raqamli studiyasiga aylangan kompaniyaga qo‘ng‘iroq qilib targ‘ibot uchun sarflayotgan xarajatlarini ikki baravarga kamaytirish yo‘lini bilishini aytadi va ular bilan ishlashni boshlaydi.
Hali prezidentlikka nomzodini qo‘yish haqida e’lon qilmagan Zelenskiy Fyodorov bilan bir taqdimot bo‘yicha gaplashib, tanishganda shunday deydi: «Qiziq, biz sen bilan nega oldinroq birga ishlamaganmiz?» O‘sha suhbatda Fyodorovning qarashlari Zelenskiyga ma’qul tushadi, hatto undan shaxsiy blogini qanday yuritish bo‘yicha maslahat so‘raydi.
Keyinchalik Zelenskiy Fyodorovni prezidentlik kampaniyasi targ‘ibotiga jalb qiladi. Aynan Fyodorov sabab Zelenskiy kampaniyasi logotipida mashhur «Ze!» so‘zi paydo bo‘ladi. Ha, Fyodorov Ukraina katta siyosatiga Zelenskiy bilan birga, uning jamoasida kirib keladi. O‘shanda uning vazifasi internetdagi targ‘ibot bo‘lgan. Inauguratsiyadan keyin prezidentning shtatdan tashqari maslahatchisi etib tayinlanadi.
Urush boshlangach, Fyodorovga raqamli transformatsiya yo‘nalishi ishonib topshiriladi. «Diya», UNITED24, «Armiya dronov», Brave 1 kabi loyihalarga ko‘zingiz tushgan bo‘lsa kerak, Zelenskiy ularni ko‘p marta reklama qilgan. Fyodorov ana shu loyihalar tepasida turgan. Urush ketayotgan bo‘lishiga qaramay, Ukraina hukumatni raqamlashtirish borasida ulkan yutuqlarga erishdi. Bunday vaqtda davlat xizmatlarini raqamlashtirish juda muhim edi, chunki urush vaqtida harakatlanish, davlat idoralarida navbat kutish oson emas. Fyodorov ana shu muhim vazifani uddalaydi.
