Prezident Shavkat Mirziyoyevning tegishli qarorlariga muvofiq, Oʻzbekiston mudofaa vaziriga yangi oʻrinbosarlar tayinlandi.
Xususan, polkovnik Zoidov Qahramonjon Obidjonovich - mudofaa vazirining qurollanish va qurollantirish boʻyicha oʻrinbosari lavozimiga tayinlandi.
Mudofaa vazirligi matbuot xizmatining Kun.uz muxbiriga maʼlum qilishicha, vazirning qurollanish va qurollantirish boʻyicha oʻrinbosari lavozimi vakant boʻlgan. Qahramonjon Zoidov tayinlovga qadar Oʻzbekiston Respublikasi harbiy xavfsizlik va mudofaa universitetining Quruqlikdagi qoʻshinlar instituti boshligʻi lavozimida faoliyat olib borgan.
Shuningdek, adliya polkovnigi Muratov Jahongir Dilshodovich - mudofaa vazirining komplayens va korrupsiyaga qarshi ichki nazorat boʻyicha oʻrinbosari lavozimiga tayinlandi.
Jahongir Muratov tayinlovga qadar Oʻzbekiston Respublikasi Harbiy prokurorining birinchi oʻrinbosari lavozimida faoliyat olib borgan.
Mudofaa vazirining komplayens va korrupsiyaga qarshi ichki nazorat boʻyicha oʻrinbosari lavozimi esa yangi joriy qilindi.
