O‘zbekiston neft-kimyo mahsulotlari eksporti bilan yangi qo‘shma korxona shug‘ullanadi

Energetika vazirligida Ozarboyjon delegatsiyasi bilan uchrashuv bo‘lib o‘tdi. Delegatsiya tarkibiga «Socar», «Socar Trading» va «Chemtrade LLC» kompaniyalari vakillari kirdi.

O‘zbekiston tomoni nomidan energetika vaziri o‘rinbosari, shuningdek «O‘zbekneftgaz» AJ va «O‘zkimyosanoat» AJ rahbariyati vakillari ish yuritdi.

Tomonlar Yevropa yo‘nalishidagi kimyoviy va neft-kimyo mahsulotlari eksportiga yo‘naltirilgan qo‘shma korxonani tashkil qilish masalasini muhokama qildi.

Ushbu rejalar O‘zbekiston va Ozarboyjon prezidenti Shavkat Mirziyoyev va Ilhom Aliyevning Turkiy tilli davlatlar hamkorlik Kengashi yig‘ilishi (2019 yil, 15 oktabr, Baku) doirasidagi uchrashuvlari paytida erishilgan kelishuvlarga muvofiq amalga oshiriladi. 

Uchrashuv davomida Ozarboyjon delegatsiyasi rahbari, «SocarTrading» kompaniyasi neftkimyo mahsulotlari departamentining marketing va sotuv bo‘yicha bosh direktori Rufat Katibli O‘zbekistonning neftni qayta ishlash zavodlariga uglevodorod xomashyosini yetkazib berishdan manfaatdor ekanligini ham ma'lum qildi.

Uchrashuv yakunlariga ko‘ra, maqsadlar bayonnomasi, shuningdek, SOCAR, «O‘zbekneftgaz» AJ va «O‘zkimyosanoat» AJ o‘rtasida qo‘shma korxonani tuzish to‘g‘risidagi «Yo‘l xaritasi»ni tayyorlash va imzolash haqida kelishuvga erishildi. U kimyo, neft-kimyo mahsulotlari va o‘g‘itlarni Yevropa bozorlariga yetkazib berish bilan shug‘ullanadi.