Davlat ekologiya qo‘mitasi Stokgolm konvensiyasiga rioya etilishini nazorat qiladi

Turg‘un organik ifloslantiruvchi moddalar haqidagi Stokgolm konvensiyasi amalga oshirilishi uchun mas'ul vakolatli organ belgilandi.
 
Eslatib o‘tamiz, Stokgolm konvensiyasida qasddan yoki beqasd ishlab chiqarish va qo‘llash natijasida hosil bo‘ladigan ifloslantiruvchi moddalarni qisqartirish yoki yo‘qotishga doir, shuningdek ularning zaxiralari va chiqindilari bilan bog‘liq kompleks chora-tadbirlar nazarda tutilgan. O‘zbekiston joriy yilning may oyida ushbu xalqaro hujjatni ratifikatsiya qilgan.
 
Norma’ning yozishicha, shu munosabat bilan Ekologiya va atrof muhitni muhofaza qilish davlat qo‘mitasiga quyidagi vazifalar yuklandi:

• Konvensiya amalga oshirilishini ta'minlash bo‘yicha vazirliklar va idoralar, mahalliy ijroiya hokimiyati organlari va boshqa tashkilotlarning faoliyatini muvofiqlashtirish;
• Konvensiya bo‘yicha Milliy harakatlar rejasini o‘z vaqtida ishlab chiqish va muntazam ravishda yangilash;
• Konvensiya talablarini bajarish masalalari bo‘yicha xalqaro va mintaqaviy tashkilotlar bilan samarali hamkorlik qilishni ta'minlash.  
 
O‘zbekiston TIV O‘zbekistonning vakolatli organi haqida Konvensiya Kotibiyatiga tegishli xabarnoma yuboradi.