Senator: «Qurilish bilan shug‘ullanadigan pudrat tashkilotlarining aniq reyestri to‘liq shakllanmagan»

Oliy Majlisi Senatining yalpi majlisida Budjet va iqtisodiy islohotlar masalalari qo‘mitasi raisi Muxamet Jumagaldiyev arzon uy-joylarni qurish jarayonidagi kamchilik va muammolarni aytib o‘tdi.

“Buyurtmachi va pudrat tashkilotlarining o‘zaro kelishuvi natijasida qurib foydalanishga topshirilayotgan uy-joylarning narxi bir tomonlama, fuqarolarni ogohlantirmasdan o‘zgartirilib, fuqarolarning qonuniy huquqlarining buzilishiga yo‘q qo‘yilmoqda.

Pudrat tashkilotlarini tanlashdagi huquqbuzarliklar holatlarining mavjudligi, yer maydoni ajratilishini qonuniylashtirish, hududiy komissiyalar a'zolarining turli byurokratik to‘siqlari, mahalliy hokimliklar tomonidan qarorlar qabul qilishning asossiz cho‘zib yuborilayotganligi, aholi talablari, qolaversa, gaz, elektr energiyasi, kanalizatsiya, suv va boshqa kommunikatsiya tarmoqlariga ulanish imkoniyatlari to‘liq o‘rganilmasdan yer uchastkalarining tanlanishi hisobiga milliardlab ortiqcha mablag‘ sarflanishiga olib kelmoqda.

Qurilish bilan shug‘ullanadigan moddiy-texnika bazasi, ishchi kuchi va o‘z mablag‘iga ega, salohiyatli pudrat tashkilotlarining aniq reyestri, ro‘yxati, elektron ma'lumotlar bazasi to‘liq shakllanmaganligi, qurilish tashkilotining mas'uliyatsizligi tufayli qurilish ishlari layoqatsiz pudratchi va subpudrat tashkilotlari tomonidan amalga oshirilayotgani arzon, ko‘p kvartirali uy-joylarni loyihalash, ularni qurish qoidalari, qurilish va montaj, ishlari ustidan nazorat qat'iy olib borilmayotganligi Parlament so‘rovini tayyorlashimizga sabab bo‘ldi”, - deya Muxamet Jumagaldiyevning so‘zlarini keltirmoqda Kun.uz muxbiri.

Senator tomonidan berilgan ma'lumotlarga ko‘ra, so‘nggi 3 yilda 104 mingdan ortiq, jumladan, qishloqlarda 63 mingdan ortiq, shaharlarda 41 mingdan ortiq uy-joylar qurib topshirilishi natijasida 100 mingdan ortiq oila uy-joylar bilan ta'minlandi. 

Senatorlar arzon uy-joylar qurish jarayonidagi muammolar, shuningdek, aholini tabiiy gaz va elektr energiyasi bilan ta'minlash jarayonidagi muammolar to‘g‘risida O‘zbekiston Respublikasi Vazirlar Mahkamasiga parlament so‘rovlari yuborilishini ma'qulladilar.