Bir vaqtning o‘zida ikkita davlatdan pensiya olib kelayotgan fuqarolar aniqlandi

O‘zbekistonda joriy etilgan “Pensiya” dasturiga kiritilgan ma'lumotlar asosida qo‘shni Qozog‘iston Respublikasidan tashrif buyurgan hamkasblar o‘rtasida o‘zaro tajriba almashish hamda ma'lumotlarni solishtirish amaliyoti jarayonida bir vaqtning o‘zida ikkita davlatdan (O‘zbekiston va Qozog‘iston) bir xil turdagi pensiya olib kelayotgan 78 nafar fuqaroning pensiyalari shubha ostiga olinib, ularga aniqlik kiritish va noqonuniy holatlarning oldini olish yuzasidan hamkorlikdagi monitoringlar olib borildi.

Soliq plus’ning Pensiya jamg‘armasi ijro etuvchi apparati bo‘lim boshlig‘i Abdurashid Ismoilovga asosan yozishicha, o‘tkazilgan tezkor solishtirish hamda monitoring natijalariga ko‘ra, bugungi kunga qadar jami 8 nafar fuqaro tomonidan 294,1 mln. so‘m miqdoridagi O‘zbekiston Respublikasi Moliya vazirligi huzuridagi Budjetdan tashqari Pensiya jamg‘armasi mablag‘lari o‘zlashtirib kelinganligi aniqlandi.

Toshkent shahar Olmazor tumanida yashovchi fuqaro B.A.ning bir vaqtning o‘zida ikkita davlat (O‘zbekiston va Qozog‘iston)dan pensiya tayinlantirib, bir necha yillardan buyon pensiya olib kelayotganligi natijasida 42,1 mln. so‘m, yana shu tuman fuqarosi R.D. tomonidan 5,7 mln. so‘m, Shayxontohur tumanida yashovchi fuqaro X.B. tomonidan 57,2 mln. so‘m miqdoridagi mablag‘lar o‘zlashtirilgan.

Toshkent viloyatining O‘rta Chirchiq tumanida yashovchi ikki nafar fuqarolar B.G. hamda I.E.lar tomonidan jami 86,3 mln. so‘m miqdoridagi Jamg‘arma mablag‘lari noqonuniy yo‘l bilan o‘zlashtirilib, bir vaqtning o‘zida ikkita davlatdan pensiya olib kelganligi aniqlandi.

Yuqori Chirchiq tumanida yashovchi fuqaro A.Sh. tomonidan 12,7 mln. so‘m va Quyi Chirchiq tumanida yashovchi fuqaro A.R.tomonidan 28,8 mln. so‘m miqdoridagi Jamg‘arma mablag‘lari bir necha yillar davomida o‘zlashtirib kelingan.

Navoiy viloyatining Zarafshon shahrida yashovchi fuqaro L.Z. ham bir vaqtning o‘zida ikkita davlatdan pensiya olib kelgan. Uning shu kungacha O‘zbekiston Respublikasidan olib kelgan 61,4 mln. so‘m miqdorida o‘zlashtirgan pensiya puli o‘rganish davomida Jamg‘arma hisobiga qaytarib undirildi.

Bugungi kunda O‘zbekiston Respublikasi Pensiya jamg‘armasi amaliyotida foydalanilayotgan “Pensiya” dasturidagi ma'lumotlarga asosan ikki davlatdan pensiya olib kelayotganligi shubha qilinayotgan 70 nafar fuqaroning ro‘yxati shakllantirilgan bo‘lib, ikki davlatning pensiya ta'minoti bo‘yicha mas'ullari hamkorligida monitoring ishlari davom ettirilmoqda.

Budjetdan tashqari pensiya jamg‘armasi mablag‘larining maqsadli sarflanishini ta'minlash hamda yo‘l qo‘yilgan salbiy holatlarning oldini olish maqsadida, yuqorida ko‘rsatib o‘tilgan barcha holatlar yuzasidan to‘plangan tekshirish materiallari va hujjatlar huquqiy baho berish uchun huquqni muhofaza qilish idoralariga topshirilib, hozirda tergov oldi harakatlari bilan jami o‘zlashtirilgan mablag‘larning 98,2 mln. so‘mi Jamg‘arma hisobiga undirildi.